قازاقستان پرەزيدەنتى قاسىم-جومارت توقايەۆ توتەنشە جاعداي كەزىندە تابىسىنان ايىرىلعاندارعا ەڭ تومەنگى جالاقى مولشەرىندە، 42500 تەڭگە جاردەماقى تولەۋدى تاپسىردى. بۇل تۋرالى ول بۇگىن اقوردادا توتەنشە جاعداي جونىندەگى مەملەكەتتىك كوميسسيا وتىرىسىندا ايتتى. 

"كارانتين ەنگىزىلگەن سوڭ تەك الماتىنىڭ وزىندە كاسىپورىنداردىڭ قىزمەتكەرلەر سانى 266 مىڭ ادامعا قىسقارادى. ءدال وسىنداي جاعداي جەكە كاسىپتە دە بايقالدى. ولاردىڭ 80 پايىزى ءوز قىزمەتتەرىن توقتاتتى. وسىلايشا، الدىن الا ەسەپتەۋلەرگە سايكەس، توتەنشە جاعداي شامامەن 500 مىڭ ازاماتتىڭ قارجىلىق جاعدايىنا كەرى اسەرىن تيگىزدى. سوندىقتان توتەنشە جاعداي كەزىندە تابىسىنان ايىرىلعاندارعا ەڭ تومەنگى جالاقى مولشەرىندە، 42500 تەڭگە جاردەماقى تولەۋدى تاپسىرامىن" دەدى توقايەۆ.

پرەزيدەنت جاردەماقى تولەۋدىڭ ءتيىمدى جانە اشىق تەتىگىن ازىرلەۋدى توتەنشە جاعداي جونىندەگى مەملەكەتتىك كوميسسياعا تاپسىردى. ياعني، تابىسىنان ايىرىلعاندارعا جاردەماقى تولەۋ ءتارتىبىن توتەنشە جاعدايعا بايلانىستى قۇرىلعان مەملەكەتتىك كومميسيا شەشەدى. 

بۇدان بولەك، توقايەۆ ۇكىمەت پەن جەرگىلىكتى اكىمدىكتەرگە قوسىمشا قاراجات تاۋىپ، كوروناۆيرۋسقا قارسى ءىس-شارالارعا جۇمىلدىرىلعان دارىگەرلەرگە، پوليسەيلەرگە جانە وزگە دە ماماندارعا 1 لاۋازىمدىق جالاقى كولەمىندە سىياقى تولەۋدى تاپسىردى. 

پرەزيدەنت توقايەۆ قازاقستاندا كوروناۆيرۋسقا بايلانىستى 15 ساۋىرگە دەيىن توتەنشە جاعداي جاريالاعان بولاتىن. ال 19 ناۋرىزدان باستاپ ەلدىڭ ەكى ءىرى قالاسى – الماتى مەن نۇر-سۇلتان كارانتينگە جابىلدى. 

دەنساۋلىق ساقتاۋ مينيسترلىگىنىڭ سوڭعى اقپاراتى بويىنشا، ەلدە 62 ادامنان كوروناۆيرۋس تابىلعان.