ۇلتتىق ۇلان جاۋىنگەرلەرى كارانتين رەجيمىن بۇزعان ءتورت ازاماتتى قولعا ءتۇسىردى، دەپ حابارلادى Qamshy.kz اقپارات اگەنتتىگى Polisia.kz دەرەگىن نەگىزگە الىپ.
وقيعا الماتى وبلىسى مەن قالانى ءبولىپ تۇرعان اقساي وزەنى ماڭىندا بولعان.
"كەشە ساعات 13.40 شامىسىندا ۇلاندىق جاۋىنگەرلەر الماتى قالاسىنىڭ كىرەبەرىسىنە قويىلعان توسقاۋىل بەكەتتى اينالىپ ءوتىپ، قالا اۋماعىنا كىرمەكشى بولعان ءتورت ازاماتتى قولعا ءتۇسىردى. قانات بەيسەنبايەۆ باسشىلىق جاسايتىن اسكەري توپ وزەندى كەسىپ ءوتىپ، قالا اۋماعىنا جاقىنداپ كەلە جاتقان ەكى ازاماتتى بايقايدى. ولاردى توقتاتىپ، ءمان-جايدى انىقتاعاندا جۇمىس ىزدەپ، قالا اۋماعىنا وتپەكشى بولعاندارى انىقتالدى، - دەلىنگەن حابارلمادا.
بەلگىلى بولعانداي، اتالعان نۇكتەدەگى كارانتيندىك رەجيمدى باقىلاۋ ۇلتتىق ۇلان 5571 اسكەري ءبولىمىنىڭ جاۋىنگەرلەرىنە تاپسىرىلعان.
بۇل وقيعادان سوڭ تاعى ەكى ازاماتتىڭ اقساي وزەنىن كەسىپ وتپەك بولعانى انىقتالعان. ولار رۇقساتسىز ارەكەت كەزىندە ۇلاندىقتاردىڭ قولىنا تۇسكەن.
ءقازىر بارلىعى ءمان-جايدى انىقتاۋ ءۇشىن اۋداندىق ىشكى ىستەر باسقارماسىنا جەتكىزىلگەن.
ەسكە سالا كەتەيىك، ناۋرىزدىڭ 22ء-سى كۇنى ۇلاندىق وفيسەر ەركەبۇلان بەيسەنباي ءدال وسى اقساي وزەنى ماڭىندا تاعى ءبىر ازاماتتى ۇستاپ، پوليسيا قىزمەتكەرلەرىنە تاپسىرعان بولاتىن.
پىكىر قالدىرۋ