نۇر-سۇلتاندا العاش رەت ونلاين توي وتكىزىلدى، دەپ حابارلايدى Qamshy.kz اقپارات اگەنتتىگى Almaty.tv. دەرەگىنە سۇيەنىپ.
دەرەككوز مالىمدەگەندەي، جاس جۇبايلار ەلىمىزدە العاش رەت اتا-اناسىنان بەينەقوڭىراۋ ارقىلى اق باتا العان. ونىڭ ۇستىنە، نەكەسىن ونلاين قيعان ازامات پەن اسەل ماڭىزدى ءراسىمدى ۇلىستىڭ ۇلى كۇنىنە وراي جوسپارلاعان.
دالىرەك ايتقاندا، باستاپقى شەشىم بويىنشا قۇدالىق پەن ۇزاتۋ، نەكە قيۋ ارىس قالاسىندا 22 ناۋرىزدا وتەدى دەپ كۇتىلگەن.
توي يەسى ازامات اسقار ۇلى ەلدەگى جاعدايعا بايلانىستى اۋەلدە نە ىستەرىن بىلمەي قالعانىن جەتكىزگەن.
"ارينە، قىز ۇزاتۋ بولمايدى، تەك قۇدالاسۋ بولادى اللا بۇيىرتسا. وسى دەرتتەن امان شىقساق، ەكى جاقتىڭ تانىسۋى بولادى. ونىڭ ءبارى الدا. ءبىزدىڭ نيەتىمىز بەن جوسپارىمىز بويىنشا نەكە قيۋ ارىس قالاسىندا ءوتۋى كەرەك بولعان. ءبىراق ءبارى وسى جاقتا بولدى. ونىڭ بارلىعىن جۇبايىمنىڭ اتا-اناسى، اپكەلەرىمىز تەلەفون ارقىلى حابارلاسىپ، سىرعا سالۋدىڭ بارلىعىن ۇستەل بارىسىندا بارلىعىن كورسەتتى"، – دەدى اسەل ابدىمالىك قىزى.
ال جاس جۇبايلاردىڭ تۋعان-تۋىستارى مەن جاقىندارى جىلى سوزدەر مەن تىلەكتەرىن الەۋمەتتىك جەلىلەر ارقىلى جانە بەينەقوڭىراۋلار ارقىلى جەتكىزىپ، ونلاين قۇتتىقتاعان.
ەلدەگى جاعدايعا تۇسىنىستىكپەن قاراعان ەكى جاستىڭ تۋىستارى جازعا دەيىن جاعداي تۇزەلەدى دەپ ۇمىتتەنەدى.
پىكىر قالدىرۋ