ق ر اقپارات جانە قوعامدىق دامۋ ءمينيسترى داۋرەن ابايەۆ كوروناۆيرۋسقا بايلانىستى قولعا الىنىپ جاتقان سوڭعى شارالار تۋرالى ايتىپ بەردى.

توتەنشە جاعدايعا بايلانىسى 500 مىڭ ادامعا ازىق-تۇلىك جيىنتىعى بەرىلمەك.

– ءبىر ادامعا ازىق-تۇلىك جيىنتىعىن بەرۋدىڭ ەرەكشە ءتارتىبى ازىرلەندى. ول بويىنشا كارانتين ايماعىندا تۇراتىن جانە اتاۋلى الەۋمەتتىك كومەك الاتىن وتباسىلاردىڭ 6 جاستان 18 جاسقا دەيىنگى بالالارى مەن ەرەسەك مۇشەلەرى، سونىمەن قاتار 1-توپتاعى بارلىق مۇگەدەكتەر قامتاماسىز ەتىلەدى. جالپى مۇنداي كومەكپەن جارتى ميلليوننان استام ادام قامتىلادى، – دەدى داۋرەن ابايەۆ.

مينيستر الماتىعا كوروناۆيرۋستى انىقتايتىن 266 مىڭ تەست جەتكىزىلەتىنىن ايتتى.

– 27 ناۋرىزدا الماتى قالاسىنا 266 مىڭ تەست الىپ كەلەدى. ولار كەدەندىك جانە ۆاليداسيا پروسەدۋراسىنان وتكىزىلەدى. بولجاممەن 29 ناۋرىزدا ولار ەڭ الدىمەن دارىگەرلەردىڭ قولىنا تيەدى. بۇلاردىڭ بارلىعى تەگىن تەستىلەر، – دەدى مينيستر.

ونىڭ اتاپ وتۋىنشە، وسى ۋاقىتقا دەيىن ەلدە كوروناۆيرۋس ينفەكسياسىن انىقتاۋعا ارنالعان 15 مىڭنان استام تەست جاسالدى. قازىرگى ۋاقىتتا كۇنىنە مىڭنان استام تەست جاسالىپ جاتىر. بۇل جۇمىستار الداعى ۋاقىتتا دا جالعاسادى.

توتەنشە جاعدايدىڭ ەنگىزىلۋىنە بايلانىستى 2019 جىلى كوكتەمدە شاقىرىلعان ازاماتتاردى اسكەري قىزمەتتەن بوساتۋ جانە اسكەرگە شاقىرۋ ۋاقىتشا توقتاتىلادى.