كەشە، 24 ناۋرىز كۇنى تۇندە كوروناۆيرۋس جۇقتىرعانى انىقتالعان جامبىل وبلىسىنىڭ تۇرعىنى ءبىر كۇن بۇرىن قىرعىزستاننان كەلگەن. بۇل تۋرالى جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ ايتتى. 

ونىڭ ايتۋىنشا، ۆيرۋس جۇقتىرعان ازامات جامبىل وبلىسى شۋ اۋدانىنىڭ تۇرعىنى، 29 جاستا،  جۇرگىزۋشى بولىپ جۇمىس ىستەيدى. 

"ۆيرۋس تابىلعان ازاماتپەن قارىم-قاتىنىستا بولعان ادامدار تۇگەلدەي انىقتالدى. ءقازىر 13 ادامدى كارانتينگە جاتقىزدىق. ناۋقاستىڭ جاعدايى ءبىرقالىپتى، دەنساۋلىعىنا شاعىم جوق، دەنە قىزۋى بايقالمادى" دەدى مارات جۇمانقۇلوۆ.

بۇدان بولەك، جۇمانقۇلوۆ الەۋمەتتىك جەلىدە "جامبىل وبلىسى تۇرار رىسقۇلوۆ اۋدانىنىڭ تۇرعىنىنان ۆيرۋس تابىلدى" دەگەن اقپارات جالعان ەكەنىن ايتتى. 

سوڭعى مالىمەت بويىنشا، قازاقستاندا 79 ادامنان كوروناۆيرۋس تابىلدى. الماتىدا – 31 ادام، نۇر-سۇلتاندا – 41 ادام، قاراعاندىدا – 2 ادام، الماتى وبلىسىندا – ءبىر ادام، اقتوبە وبلىسىندا – ءبىر ادام، شىمكەنتتە – ءبىر ادام، جامبىل وبلىسىندا – ءبىر ادام، سولتۇستىك قازاقستان وبلىسىندا ءبىر ادام ەمدەلىپ جاتىر.