COVID-19 كوروناۆيرۋسى پاندەمياسىنىڭ الدىن الۋ ماقساتىندا تۇركىستان وبلىسىنىڭ اكىمى ءومىرزاق شوكەيەۆ كەشەندى قاۋىپسىزدىك شارالارىن قابىلدادى. بۇل تۋرالى وبلىس اكىمدىگىنىڭ باسپا ءسوز قىزمەتى حابارلادى.

سولاردىڭ ءبىرى رەتىندە 18-ناۋرىزدان باستاپ الماتى جانە قىزىلوردا باعىتىنداعى شەكارالىق ايماقتارىنداعى «ساۋران» جانە «شاقپاق» بەكەتتەرىندە كورونوۆيرۋس دەرتىنە بايلانىستى تاۋلىك بويى جۇمىس ىستەيتىن بلوك-بەكەتتەر قويىلدى. بۇل بەكەتتەردە پوليسيا جانە مەديسينا ماماندارى ءاربىر كولىكتى توقتاتىپ، ارنايى قۇرىلعىمەن ازاماتتاردىڭ دەنە قىزۋلارىن ولشەپ، تەكسەرىستەن وتكىزۋدە.

"اتالعان بلوك-بەكەتتەردىڭ جۇيەلى جۇمىسىنىڭ ارقاسىندا شىمكەنت-نۇر-سۇلتان باعىتىنداعى kz 646 FNB 13 رەگيون ءنومىرلى اۆتوبۋستاعى كوروناۆيرۋس جۇقتىرعان ازاماتپەن بىرگە كەلگەن 56 ادامنىڭ ناقتى دەرەگى انىقتالىپ وتىر. كولىكتەگى جولاۋشىلار تۋرالى تولىق اقپاراتتى تۇركىستان وبلىسى تۇلكىباس اۋدانىنداعى شاقپاق بەكەتىنىڭ قىزمەتكەرلەرى 20 ناۋرىز كۇنى جازىپ العان. قازىرگى كەزدە اتالعان ازاماتتار وقشاۋلانۋعا الىندى. الداعى ۋاقىتتا وبلىس تۇرعىندارىن ساقتىق شارالارىن كۇشەيتىپ، سالعىرتتىق تانىتپاۋعا شاقىرامىز" دەلىنگەن اقپاراتتىق حابارلامادا.

تۇركىستان وبلىسىنىڭ شەكارالىق جەرلەرىنە 35 بلوك-بەكەت قويىلعان بولاتىن. ونىڭ ىشىندە 31ء-ى ەلدىمەكەندەردە، ال 4ء-ى تەمىرجول ۆوكزالى مەن ستانسيالاردا ورنالاسقان. اتالعان بەكەتتەردە بۇگىندە 37 مەديسينالىق، پوليسيا قىزمەتكەرلەرى جۇمىس ىستەۋدە.

قازىرگى تاڭدا بلوك-بەكەتتەردەگى پوليسيا مەن مەديسينا قىزمەتكەرلەرى جۇمىس كۇشەيتىلگەن رەجيمگە كوشكەن. ءقاۋىپتى ىندەتكە قارسى ماماندار ءاربىر كولىكتى توقتاتىپ، ارنايى قۇرىلعىنىڭ كومەگىمەن ازاماتتاردىڭ دەنە قىزۋىن ولشەپ، تەكسەرىستەن وتكىزىپ جاتىر.