نۇر-سۇلتان، الماتى جانە شىمكەنت قالالارىندا شەكتەۋ شارالارى كۇشەيتىلەدى. بۇل تۋرالى ق ر پرەمەر-مينيسترى اسقار ءماميننىڭ توراعالىعىمەن ق ر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ سەلەكتورلىق وتىرىسىندا بەلگىلى بولدى.

مەملەكەتتىك كوميسسيا بيىلعى 28 ناۋرىز كۇنگى ساعات 00.00-دەن باستاپ كەلەسى شارالاردى قابىلداۋ ارقىلى نۇر-سۇلتان جانە الماتى قالالارىندا كارانتين رەجيمىن كۇشەيتۋ تۋرالى شەشىمدى بەكىتتى:

1. ازىق-تۇلىك، دارى-دارمەك ساتىپ الۋدى جانە جۇمىسقا بارۋدى قوسپاعاندا، ازاماتتاردىڭ تۇرعىن ۇيدەن شىعۋىن شەكتەۋ؛

2. حالىق كوپ جينالاتىن ورىنداردى جابۋ (ساياباقتار، سكۆەرلەر، جاياۋ جۇرەتىن كوشەلەر، جاعالاۋلار، ويىن الاڭدارى جانە ت. ب.)؛

3. قوعامدىق كولىك جۇمىسىن كەزەڭ-كەزەڭمەن شەكتەۋ؛

4. كوشەلەردە جانە باسقا دا قوعامدىق ورىنداردا ءۇش ادامنان ارتىق توپتاسىپ جينالۋعا تىيىم سالۋ (وتباسى مۇشەلەرىنەن باسقا)؛

5. كامەلەتتىك جاسقا تولماعانداردىڭ ۇلكەندەرسىز سىرتتا جۇرۋىنە تىيىم سالۋ.

سونىمەن قاتار كوروناۆيرۋستىق ينفەكسيانىڭ تارالۋىنا جول بەرمەۋ ماقساتىندا شىمكەنت قالاسىنداعى اباي اۋدانىندا "تاۋەلسىزدىككە 20 جىل" تۇرعىن ءۇي الابىندا ءۇي-ۇيدى ارالاۋدى ۇيىمداستىرۋمەن 14 كۇنگە سوزىلاتىن كارانتين ەنگىزىلەتىنىن اتاپ ءوتتى. 

شىمكەنت قالاسىندا سونىمەن قاتار اۋەجايدىڭ، تەمىرجول ۆوكزالى جانە اۆتوۆوكزالدىڭ، بالاباقشالاردىڭ جۇمىسى توقتاتىلادى. حالىق كوپ جينالاتىن جەرلەر جابىلادى (ساياباقتار، سكۆەرلەر، جاياۋ جۇرگىنشى كوشەلەرى، ويىن الاڭدارى ت. ب.). قوعامدىق تاماقتاندىرۋ ورىندارىنىڭ جۇمىسى ساعات 18.00-گە دەيىن شەكتەلەدى (ساعات 18.00-دەن ساعات 22.00-گە دەيىن ۇيگە جەتكىزۋمەن). قوعامدىق كولىك قوزعالىسى كەزەڭ-كەزەڭمەن شەكتەلەدى. ازىق-تۇلىك دۇكەندەرىنىڭ، ساۋدا ورتالىقتارى مەن كيىم-كەشەك بازارلارىنىڭ، قىزمەت كورسەتەتىن نىسانداردىڭ جۇمىس رەجيمىن شەكتەۋ شىمكەنت قالاسىنىڭ اكىمىنىڭ شەشىمى بويىنشا جۇزەگە اسىرىلادى. 

ۇكىمەت باسشىسى دەنساۋلىق ساقتاۋ مينيسترلىگىنە ادىلەت مينيسترلىگىمەن بىرلەسىپ شەكتەۋ شارالارىن ەنگىزۋ بويىنشا ءتيىستى اكتىنى قابىلداۋدى تاپسىردى. 

وتىرىسقا قاتىسۋشىلار سونىمەن قاتار تۇرعىنداردى الەۋمەتتىك ماڭىزى بار ازىق-تۇلىك ونىمدەرىمەن قامتاماسىز ەتۋ جانە ولاردىڭ باعاسىن تۇراقتاندىرۋ، كوكتەمگى كانيكۋلدان كەيىن مەكتەپ وقۋشىلارىنىڭ قاشىقتان وقۋىن ۇيىمداستىرۋ (بيىل 6 ساۋىردەن باستاپ)، سونداي-اق شەتەلدە قالعان، وتانعا ورالۋعا نيەتتى ق ر ازاماتتارىنا قولداۋ كورسەتۋ ماسەلەلەرىن قاراستىردى.