ءبىلىم جانە عىلىم ۆيسە-مينيسترى شولپان كارينوۆا قاشىقتان وقىتۋ كەزىندە ءار ءپان بويىنشا، باعالاۋ جۇيەسى بولادى دەپ ۆەب كونفەرەنسيادا مالىمدەدى. بۇل تۋرالى 24.kz حابارلادى. 

شولپان كارينوۆانىڭ ايتۋىنشا، ۇستازدار وزدەرىنە قولايلى ينتەرنەت-پلاتفورمانى تاڭداي الادى. سوعان سايكەس، ساباق جوسپارىن بەكىتىپ، وقۋشىلارعا تاپسىرما بەرەدى. ال باعالاۋ جۇيەسى ەلەكتروندى تۇردە نەمەسە وسىعان دەيىن قولدانىلىپ كەلگەن قاعاز جۋرنالدار ارقىلى جۇزەگە اسىرىلادى.

سونىمەن قاتار ونلاين وقىتۋ ەرتەڭ باستالاتىنىن جانە جاۋاپتى مينيسترلىك وكىلدەرى بۇگىن مەكتەپ ديرەكتورلارىمەن بايلانىسقا شىعىپ، ءدارىس بارىسىن پىسىقتايدى دەپ مالىمدەدى. ەگەر اتا-انالار مەن وقۋشىلاردىڭ ونلاين بايلانىسقا شىعۋعا مۇمكىندىكتەرى بولماسا، وندا وقىتۋ جۇيەسى پوشتا ارقىلى ۇيىمداستىرىلاتىنىن دا اتاپ ءوتتى.

ءتورتىنشى توقسان اياسىندا مەكتەپ وقۋشىلارىنا تەلەساباقتار قالاي وتكىزىلەتىنىن ەسكە سالا كەتەيىك:

• تەلەساباقتار ءتيىستى كەستەگە سايكەس وتكىزىلەدى، ساباق تاڭعى ساعات 9:00-دە باستالادى. بىرىنشىدەن، تەلەارنالار ارقىلى ساباقتار بۇل «بالاپان»، «ەل ارنا» ارقىلى وتكىزىلەدى. ساباق بىرەۋىندە قازاقشا، ەكىنشىسىندە ورىس تىلىندە جۇرگىزىلەدى. كۇنىنە 8 ساعاتتان ەفير بەلگىلەنگەن. 
• قاشىقتان وقىتۋ اياسىندا ءاربىر ءمۇعالىمنىڭ شىعارماشىلىق قادامى ەسكەرىلەدى. بۇرىندارى ساباق 08:00-دە باستالىپ، ودان كەيىن 10 مينۋت ءۇزىلىس بەرىلىپ، قايتادان كەلەسى ساباق بولاتىن. ال قاشىقتان وقىتۋ وزگەشە جۇرگىزىلەدى. مەكتەپ ديرەكتورلارى مۇعالىمدەردەن ەسەپ بەرۋدى تالاپ ەتپەيدى. ءمۇعالىم ءار بالامەن جەكەلەي وتكەن ماتەريالدى پىسىقتايدى.
• تەلەساباقتىڭ ءارقايسى 10 مينۋتقا سوزىلادى. وسىدان كەيىن وتكەن تاقىرىپ بويىنشا ءمۇعالىم قوسىمشا ماتەريال ۇسىنۋى كەرەك. وقۋ قۇرالىنا نەگىزدەلە وتىرىپ، وقۋشىلار ءۇشىن ءۇي تاپسىرماسىن دايىنداۋ قاجەت. ەگەر ينتەرنەتكە قوسىلۋ مۇمكىندىگى بولسا، وندا «Bilimland»، «كۇندەلىك»، «دارىن ونلاين» سەكىلدى وقىتۋ تۇعىرنامالارىن قوسىمشا پايدالانۋعا كەڭەس بەرىلگەن.
• كەرى بايلانىستى ەلەكتروندى جۋرنالدار ارقىلى ىسكە اسىرۋعا بولادى. التى مىڭنان استام مەكتەپ «كۇندەلىك» ەلەكتروندى جۋرنالىنا تىركەلگەن. سونىمەن قاتار، پايدالانۋعا بولاتىن جۋرنالداردىڭ باسقا دا تۇرلەرى بار. ەگەر ولار قولجەتىمسىز بولسا، وندا قاعاز تۇرىندەگى ءداستۇرلى جۋرنالدى پايدالانۋ مۇمكىندىگى بار. ءمۇعالىم وقۋشى قاي تاپسىرمالاردى ورىنداعانىن بەلگىلىپ، بالانىڭ جۇمىسىن باعالايدى.