قازىرگى تاڭدا الەم بويىنشا COVID-19 ۆيرۋسىن جۇقتىرعاندار امەريكا قۇراما شتاتتارىندا كوپ تىركەلىپ وتىر. Reuters اگەنتتىگىنىڭ حابارلاۋىنشا، اقش-تا كوروناۆيرۋس جۇقتىرعان 306 مىڭنان استام تىركەلىپ، 8،3 مىڭنان استام ادام پاندەميادان كوز جۇمعان.

– ءبىز وتە قورقىنىشتى كەزەڭگە كەلە جاتىرمىز. ءبىز مۇنداي سانداعى ءولىم-جىتىمدى كورگەن ەمەسپىز. مۇمكىن، سوعىس كەزىندە، ءبىرىنشى نەمەسە ەكىنشى دۇنيەجۇزىلىك سوعىس كەزىندە دە كورمەدىك، – دەدى دونالد ترامپ اق ۇيدەگى بريفينگتە.

اق ءۇي مەديسينا ماماندارىنىڭ ايتۋىنشا، ۇيدە بولۋعا قاتىستى بۇيرىقتار ورىندالسا دا پاندەميا كەزىندە 100 مىڭنان 240 مىڭعا دەيىن مولشەردەگى امەريكالىق قايتىس بولۋى مۇمكىن.

نيۋ-يورك گۋبەرناتورى ەندرو كۋومو "ءبىزدىڭ شتاتتا سوڭعى 24 ساعات ىشىندە كوروناۆيرۋس 630 ادامنىڭ ءومىرىن قيدى" دەپ حابارلادى.

قازىرگە دەيىن نيۋ-يوركتە پاندەميادان 3565 ادام كوز جۇمدى. اسىرەسە، نيۋ-يوركتىڭ شىعىسىنداعى لونگ-ايلەندتە جاعداي ءورشىپ تۇر. ونداعى جاعداي "ءورت سياقتى"  دەدى كۋومو باسپا ءسوز ءماسليحاتىندا.