الماتىدا 2 ادام كوروناۆيرۋس ىندەتىنەن ەمدەلىپ شىقتى. بۇل تۋرالى قالا اكىمىنىڭ باسپا ءسوز قىزمەتى حابارلادى.

"بۇگىن كوروناۆيرۋس دەرتىنەن ايىققان تاعى ەكى پاسيەنت ۇيلەرىنە جىبەرىلدى. بۇل 1997 جانە 1998 جىلعى ەكى بويجەتكەن. ولاردىڭ ءبىرى 15 ناۋرىزدا ىستانبۇل-الماتى رەيسىمەن ۇشىپ كەلگەن، ەكىنشىسى ۆيرۋس انىقتالعان اداممەن بايلانىستا بولعان" دەلىنگەن اكىمدىك تاراتقان حابارلامادا.

قازاقستان بويىنشا كورونوۆيرۋس ينفەكسياسىنان جازىلعاندار سانى 44-كە جەتتى. ال سوڭعى مالىمەت بويىنشا ەلىمىزدە 584 جاعداي تىركەلگەن.

الماتى قالاسىندا كوروناۆيرۋس جۇقتىرۋدىڭ 116 وقيعاسى تىركەلدى. اۋرۋعا شالدىققاندارمەن بايلانىستا بولعان التى ادامنان ۆيرۋس انىقتالعان.

قازىرگى كەزدە قالانىڭ ينفەكسيالىق ستاسيونارلارىندا COVID-19 دياگنوزى قويىلعان 96 پاسيەنت جاتىر، ولاردىڭ ءبىرى – الماتى وبلىسىنىڭ تۇرعىنى.

79 ناۋقاستىڭ جاعدايى قاناعاتتانارلىق. ەرەسەك ەكى ادامنىڭ جاعدايى وتە اۋىر، تاعى ەكەۋىنىڭ جاعدايى اۋىر، 13 ادام – ورتاشا اۋىر حالدە جاتىر. 

بۇگىندە الماتىدا 21 ادام اۋرۋحانادان شىعارىلدى، سونىڭ ىشىندە ەكى بالا بار. ولاردىڭ بارلىعى 14 كۇندىك ءۇي جاعدايىنداعى كارانتيندە جاتىر.

قازىرگى كەزدە ۋاقىتشا ورتالىقتاردا 521 ادام بار، سونىڭ ىشىندە 79-ى – بالا.

ەكى كۇندىك كارانتيندە 390 ازامات (48 بالا)، ال ءۇي جاعدايىنداعى كارانتيندە – 4 805 ادام جاتىر.