قالا اكىمدىگىنىڭ باسپا ءسوز ورتالىعىندا الماتى قالاسى قورعانىس ىستەرى جونىندەگى دەپارتامەنتىنىڭ باسشىسى امانتاي وسەربايەۆتىڭ قاتىسۋىمەن اسكەري مىندەتتىلەردى ارنايى جيىندارعا شاقىرۋ ماسەلەلەرىن ءتۇسىندىرۋ بويىنشا ونلاين بريفينگ ءوتتى.

– الماتىدا اسكەرگە بارۋعا ءوز ەركىمەن كەلىسكەن 300-گە جۋىق ەرىكتى توتەنشە جاعدايعا كومەكتەسۋگە دايىن ەكەندىكتەرىن ءبىلدىردى. سونىڭ ىشىنەن اسكەر قاتارىنا 200-دەي ازامات ىرىكتەلىپ الىنادى. اسكەري بورىشىن وتەۋ مەرزىمى ءبىر اي. ازىرگە وسى جۇمىستار بويىنشا الماتى قالاسى اكىمىنىڭ ارنايى ۇكىمىن كۇتىپ وتىرمىز. وسى ۇكىمگە بايلانىستى اسكەر قاتارىنا شاقىرىلاتىنداردىڭ ناقتى سانى مەن مەرزىمى بەلگىلى بولادى، – دەدى ا. وسەربايەۆ.

الماتىدا اسكەري ەسەپتە تۇرعان جانە دەنساۋلىق جاعدايى بويىنشا جارامدى دەپ تانىلعان ازاماتتاردى ارنايى جيىندارعا شاقىرۋ شامامەن 1 ايعا سوزىلادى. سونداي-اق ازاماتتار اسكەرگە تۇرعىلىقتى مەكەن-جايى بويىنشا شاقىرىلادى. ولار اسكەري مىندەتىن اتقارعان سوڭ كۇن سايىن ۇيىنە جىبەرىلىپ وتىرادى ەكەن.

بريفينگتە سپيكەر ارنايى جيىندارعا شاقىرىلعان ازاماتتاردىڭ ەڭبەكاقىسىنا دا توقتالدى.

– ارنايى جيىندار كەزىندە اسكەري قىزمەتكە مىندەتتى ازاماتتاردىڭ جۇمىس ورنى جانە اتقارعان لاۋازىمى ساقتالادى. ەگەر ادام جۇمىس ىستەمەسە، وندا جالاقىنىڭ تومەنگى مولشەرى – 42 500 تگ بولادى، – دەدى دەپارتامەنت باسشىسى.

سونىمەن قاتار، ا. وسەربايەۆ قالانىڭ ءار اۋدانىندا ورنالاسقان قورعانىس ءىسى جونىندەگى دەپارتامەنت بولىمشەلەرى اسكەري قىزمەتكە كەلۋشىلەردى جاساقتاۋعا جانە ولاردى مەديسينالىق تەكسەرۋدەن وتكىزۋگە تولىق دايىن ەكەندىگىن دە جەتكىزدى.

 

– زاڭ بويىنشا 60 جاسقا دەيىنگى وفيسەرلەر، 50 جاسقا دەيىنگى اسكەريلەر، سەرجانتتار اسكەري بورىشىن وتەۋگە مىندەتتى. ال اسكەر قاتارىنا ايەل ازاماتتار شاقىرىلمايدى. ءتىپتى، ول ايەل ازاماتتىڭ ءوز ەركى بولسا، بۇل زاڭدا قاراستىرىلماعان، – دەدى سپيكەر.

ايتا كەتۋ كەرەك، اسكەري قىزمەتكە شاقىرىلعاندا دەنساۋلىعى ناشار، وتباسى جاعدايى اۋىر، بالالارى بار جانە تاعى باسقا فاكتورلاردى اسكەري كوميسساريات ەسكەرەتىن بولادى.