الماتىدا الەۋمەتتىك ماڭىزى بار ازىق-تۇلىك تاۋارلارىنىڭ شەكتى باعاسى بەكىتىلدى. بۇل تۋرالى كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين قالا اكىمدىگىنىڭ باسپا ءسوز ورتالىعىندا وتكەن بريفينگتە مالىمدەدى.

– بىزدە 64 ءتۇرلى ازىق-تۇلىك ونىمدەرى بار، ونىڭ 19-ى الەۋمەتتىك ماڭىزى بار تاعام تۇرلەرىنە جاتادى. سونىڭ ىشىندەگى 9 ءتۇرلى ازىق-تۇلىك ونىمىنە شەكتى باعالار قويىلىپ وتىر. اتاپ ايتار بولسام، ءبىرىنشى سورتتى بيداي ۇنى – 211 تگ/كگ، ءبىرىنشى سورتتى ۇننان جاسالعان بيداي نانى (ءپىشىندى) – 80-تەڭگەگە دەيىن، روجكي (ولشەنىپ سالىناتىن) – 209 تگ/كگ، قاراقۇمىق جارماسى – 339 تگ/كگ، كۇرىش – 310 تگ/كگ، سيىر ەتى (سۇيەكتى ءجاۋىرىن-توس بولىگى) – 2169 تگ/كگ، تاۋىق جۇمىرتقاسى (I ساناتتى) – 367 تگ/10 داناسى، كۇنباعىس مايى – 434 تگ/ليتر جانە اس تۇزىنا – 59 تەڭگە دەپ باعا قويىلعان، – دەدى  ەركەبۇلان ورازالين.

 

ونىڭ ايتۋىنشا، جوعارىدا اتالعان تاۋار تۇرلەرى سوڭعى ايدا قازاقستاندىقتاردىڭ ازىق-تۇلىك تاۋارلارىنا دەگەن سۇرانىسىن تالداۋ ناتيجەسىندە انىقتالعان. ياعني، وسى تاۋار تۇرلەرى كوپ ساتىلعاندىقتان دا، جىل باسىنان باستاپ بۇلاردىڭ باعاسى وسكەن. دەگەنمەن، ەندى جوعارىدا اتالعان تاۋارلاردىڭ باعاسىن وسىرگەندەر انىقتالسا، ولارعا 265 100 تەڭگەدەن 530 200 تەڭگەگە دەيىن ايىپپۇل تۇرىندە جازا بەلگىلەنەدى.

– قازىرگى ۋاقىتتا الماتى قالاسىنىڭ اۋداندىق اكىمدىكتەرىندە كۇن سايىن ساۋدا نۇكتەلەرىن ارالاپ شىعاتىن كوميسسيالار مەن موبيلدىك توپتار قۇرىلدى. ءبىز ءىرى ساۋدا نىساندارىن ارالاپ، ولارعا شەكتى باعا بەلگىلەنگەن 9 ءونىم بويىنشا باعانىڭ تۇراقتى بولۋىنا ەسكەرتۋ جاسادىق. ەگەر نەگىزسىز باعانىڭ وسكەنىن بايقاپ، قانداي دا ءبىر ءتارتىپ بۇزۋشىلىق انىقتالاتىن بولسا، ءموبيلدى توپ بايانات (راپورت) جازىپ، فوتو جانە بەينە-ەسەپ جاسايدى. سودان كەيىن بۇل ماتەريالدار كوميسسيانىڭ قاراۋىنا جىبەرىلەتىن بولادى. زاڭ بۇزۋشىلىق ورىن السا ەكى ءتۇرلى باعىتتا جازالانۋى مۇمكىن، ءبىرىنشىسى، 100 اەك مولشەرىندە اكىمشىلىك ايىپپۇل تولەيدى، ەكىنشىسى، بۇل بەرەشەكتى ءبىر اپتا جانە جازباشا كەلىسىم ىشىندە وتەگەن جاعدايدا ايىپپۇلدى 50 اەك-كە دەيىن قىسقارتۋعا مۇمكىندىك بەرەدى. ايتپەسە، قاۋلى سوتقا جىبەرىلەدى، – دەپ اتاپ ءوتتى باسقارما باسشىسى.

سونىمەن قاتار ەركەبۇلان ورازالين الماتى قالاسى بويىنشا بارلىق 9 اتاۋ بويىنشا ءىرى بازاردان باستاپ ءۇيدىڭ جانىنداعى دۇكەندەرگە دەيىن ساتۋشىلارعا جوعارىدا كورسەتىلگەن تاريفتەردەن باعانى اسىرۋعا رۇقسات بەرىلمەيتىنىن جانە قالانىڭ بارلىق دۇكەندەرىندە ازىق-تۇلىك جەتكىلىكتى مولشەردە ەكەنىن اتاپ ءوتتى. 

 

وسىلايشا، بۇگىنگى كۇنى الماتىدا الەۋمەتتىك ماڭىزى بار تاۋارلاردىڭ شەكتى بولشەك باعالارى: