وسكەمەندىك كاسىپكەرلەر رۇقسات قاعازدارىن ەشقانداي قيىندىقسىز الىپ جاتىر. قالاداعى №38 مەكتەپكە ارنايى بارعان ايماق باسشىسى دانيال احمەتوۆ جاعدايدى ءوز كوزىمەن كورىپ، ونداعى ادامدارمەن تىلدەستى.

وسىدان بىرەر كۇن بۇرىن الەۋمەتتىك جەلىدە «ارنايى رۇقسات قاعازىن الۋعا كەلگەن كاسىپكەرلەر قالالىق اكىمدىكتىڭ الدىندا كۇنى بويى كەزەك كۇتىپ، ءتيىستى قۇجاتتارىن الا الماي تارقاستى» دەگەن اقپارات جاريالانعان بولاتىن. ىزىنشە جەلى قولدانۋشىلارى رۇقساتتامالاردىڭ جەتپەي قالعانىن، ال ول قۇجاتسىز شەكتەۋ كەزىندە قالادا ءجۇرىپ-تۇرۋدىڭ قيىنعا سوعاتىنىن ايتىپ، اجەپتاۋىر دۇرلىككەن-دى.

– وزدەرىڭىز كورىپ تۇرعانداي، ادامدار رۇقساتتامانى ەش كەدەرگىسىز الىپ جاتىر. ولارعا 200-دەي ادام قىزمەت كورسەتۋدە. ايتالىق، بەس-التى مينۋتتا شامامەن ءجۇز شاقتى ادام رۇقسات قاعازىن الىپ ۇلگەردى. ءدال وسىنداي جۇمىستار ءاربىر اكىمدىكتە جۇرگىزىلىپ جاتىر. از ۋاقىتتا بارلىق ءتيىستى مەكەمەلەر مەن كاسىپكەرلەر قامتىلاتىن بولادى. قازىرگى جاعدايدا بىزگە بۇل وتە قاجەت. رۇقسات قاعازى ەڭ الدىمەن ءتارتىپتى ساقتاۋعا جانە كوشەدەگى ادامداردىڭ سانىن ەكى ەسەگە دەيىن شەكتەۋگە كومەكتەسەدى. كوروناۆيرۋستىڭ الدىن الىپ، تارالۋىن تەجەۋ ماقساتىندا وسىنداي قادامعا بارىپ وتىرمىز، – دەگەن وبلىس اكىمى دانيال احمەتوۆ توتەنشە جاعداي كەزىندەگى تالاپتار تۋرالى قالا تۇرعىندارىنا الدىن الا ءتۇسىندىرۋ جۇمىستارى جۇرگىزىلگەنىن ەسكەرتتى.

ءيا، ايماق باسشىسى ايتقانداي، وبلىستىق «ديدار» جانە «رۋدنىي التاي» گازەتتەرىنىڭ ارنايى شىعارىلىمىندا، سونداي-اق، وبلىس، قالا اكىمدەرىنىڭ الەۋمەتتىك جەلىدەگى رەسمي پاراقشاسىندا توتەنشە جاعداي كەزىندەگى شەكتەۋ شارالارى تۋرالى تولىق ماعۇلمات بەرىلگەن. دەگەنمەن كەيبىر ادامدار تاراپىنان ازداعان تۇسىنىسپەۋشىلىك تۋىنداعانىمەن، حالىقتىڭ دەنى شەكتەۋ شارالارىنىڭ ەنگىزىلۋىن قولداپ وتىر.

– كەيبىر ماسەلەدە تۇسىنبەي جاتقان تۇستارىمىز بار. جاسىراتىن نەسى بار؟! ءبىراق بۇگىن وسى جەرگە كەلىپ، اكىمدىكتىڭ ماماندارىنان ءبارىن سۇراپ، بىلدىك. مەن - جەكە كاسىپكەرمىن. ۇن-توقاش ونىمدەرىن ءوندىرىپ، جەتكىزۋمەن اينالىسامىن. ماعان جاسىل ءتۇستى ارنايى رۇقسات قاعازىن بەردى. ەندى ەش كەدەرگىسىز كورسەتىلگەن ۋاقىتتا جۇمىس ىستەي بەرەمىن. جاقسى بولدى، – دەيدى ءوزىن ەركەبۇلان دەپ تانىستىرعان وسكەمەندىك كاسىپكەر.

ايماق باسشىسى الداعى بىرەر كۇندە گازەت جانە الەۋمەتتىك جەلى ارقىلى تاعى دا قوسىمشا اقپاراتتار بەرىلەتىنىن جەتكىزىپ، حالىقتى سابىر ساقتاپ، ءتارتىپتى بۇزباۋعا شاقىردى.

– ءبىز مىنانى ۇعۋىمىز كەرەك. ءار شاڭىراققا بەرىلىپ جاتقان رۇقسات قاعازدارى دۇكەنگە، ءدارىحاناعا جانە بانككە بارۋعا عانا قولدانىلادى. ماسەلەن، جاسىل ءتۇستى تالونمەن جۇپ كۇندەرى، اق تۇستىمەن تاق كۇندەرى سىرتقا شىعا الاسىز. ءبىراق رۇقساتىم بار ەكەن دەپ باسقا شارۋامەن جۇرۋگە بولمايدى. ويتكەنى ءبىز مۇنى كوشەدەگى ادامداردىڭ سانىن ازايتۋ ءۇشىن ىستەپ وتىرمىز. بۇعان تۇسىنىستىكپەن قاراڭىزدار، – دەپ ءتۇيدى وبلىس اكىمى.

ەستەرىڭىزگە سالا كەتەيىك، بۇگىننەن باستاپ، ياعني ءساۋىردىڭ 6-سىنان باستاپ وسكەمەن مەن سەمەيدە شەكتەۋ شارالارى كۇشەيتىلىپ، قوس قالاعا كىرىپ-شىعۋعا قاتاڭ تىيىم سالىندى. ارنايى رۇقسات قاعازى بار كولىكتەر مەن «جاسىل ءدالىز» ارقىلى جۇرەتىن ازىق-تۇلىك جانە ءبىرىنشى قاجەتتىلىكتەگى تاۋارلاردى تاسىمالداۋشىلارعا عانا قالاعا كىرۋگە رۇقسات بەرىلگەن.