ۇلىبريتانيادا پرەمەر-مينيستر بوريس دجونسون جۇمىسقا قابىلەتسىز بولعان جاعدايدا، ونىڭ جۇمىسىن كىم جالعاستىراتىنى تۋرالى الىگە دەيىن رەسمي جوسپار جوق. ءبىراق 55 جاستاعى دجونسون سىرتقى ىستەر ءمينيسترى دومينيك راابتان وزىنە ورىنباسار بولۋدى سۇرادى.
دجونسون جەكسەنبىگە قاراعان ءتۇنى اۋرۋحاناعا تۇسكەن. ونىڭ اعزاسىنداعى كوروناۆيرۋس سيمپتومدار 10 كۇن قاتارىنان ۇدەپ كەلەدى.
بريتانيا پرەمەر-مينيسترىنىڭ جاعدايى ناشارلاعاننان كەيىن ونى رەانيماسيا بولىمىنە اۋىستىرىلعان.
دجونسون كەڭسەسى – داۋننينگ ستريت ۇكىمەت باسشىسىنا رەانيماسيا بولىمىندە تىنىس الۋىن قالپىنا كەلتىرۋ ءۇشىن قۇرىلعىلار قوسىلاتىنىن ءمالىم ەتتى. دجونسون رەانيماسيا بولىمىنە اۋىسقانىمەن، ەسىن ءالى جوعالتپاعان.
