616 مىڭعا جۋىق قازاقستاندىققا تابىسىنان ايىرىلۋىنا بايلانىستى 42500 تەڭگە كولەمىندە الەۋمەتتىك تولەم تاعايىندالدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى.

ەلدە توتەنشە جاعدايدىڭ ەنگىزىلۋىنە بايلانىستى 42500 تەڭگە جاردەماقىنى الۋ ءۇشىن 1 ملن 785 مىڭ 413 ازاماتتان بارلىعى 3 ملن 593 مىڭ 853 ءوتىنىش كەلىپ تۇسكەنى انىقتالدى. وسىلايشا، 1 ملن 808 مىڭ 440 ءوتىنىش ەكى قايتارا جىبەرىلگەن. وسى رەتتە، مينيسترلىك كەلىپ تۇسەتىن مالىمەتتەردى قاراۋ مەرزىمىن قىسقارتۋ ءۇشىن ءوتىنىشتى ءبىر رەت قانا جولداۋدى سۇرايدى.

وسى ۋاقىتقا دەيىن مەملەكەتتىك الەۋمەتتىك ساقتاندىرۋ قورىنان 42500 تەڭگە كولەمىندەگى الەۋمەتتىك تولەم بارلىعى 615996 ادامعا تاعايىندالعان بولاتىن.

"دەرەكتەردى تەكسەرۋ جانە ءوتىنىشتى قاراۋ مەرزىمى 3 جۇمىس كۇنىن قۇرايدى. ءماسق-تا تولەم جاساۋ تۋرالى شەشىم قابىلدانعاننان كەيىن ءوتىنىش بەرۋشىگە SMS-حابارلاما كەلەدى. كەيىننەن ءوتىنىش بەرۋشىنىڭ دەرەكتەرى «ازاماتتارعا ارنالعان ۇكىمەت» مەملەكەتتىك كورپوراسياسى» كەاق-عا جىبەرىلەدى، ول ونى ەكىنشى دەڭگەيدەگى بانكتەرگە تولەم جۇرگىزۋ ءۇشىن جىبەرەدى. الەۋمەتتىك تولەم الۋعا ءوتىنىمدى eGov پورتالى، 42500.enbek.kz ۆەب-سايتى جانە https://t.me/Help42500Bot ادرەسى بويىنشا Telegram-بوت ارقىلى بەرۋگە بولادى"، دەلىنگەن مينيسترلىك تاراتقان حابارلامادا.