الماتى قالاسى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا قالاداعى بارلىق ءدارىحانا باعالارىنا كۇندەلىكتى مونيتورينگ جۇرگىزىلەتىنىن مالىمدەدى.

– الماتى قالاسى اۋماعىندا توتەنشە جاعداي مەن كارانتين كەزىندە دارى-دارمەكتەرگە قولجەتكىزۋ قالاي ءجۇرىپ جاتقانىنا توقتالماقشىمىن. بۇعان دەيىن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى مەن ق ر فارماسيەۆتيكالىق قىزمەتتى قولداۋ جانە دامىتۋ قاۋىمداستىعىنىڭ اراسىندا مەموراندۋمعا قول قويىلعان بولاتىن. ياعني ول مەموراندۋمعا توتەنشە جاعداي مەن كارانتين كەزىندە ەڭ قاجەت پرەپاراتتار سانالاتىن 103 دارى-دارمەك جانە مەديسينالىق ونىمدەر ءتىزىمى كىرگەن بولاتىن. ءبىز مەديسينالىق پرەپاراتتاردىڭ سانى مەن باعاسىنا كۇندەلىكتى مونيتورينگ جاساپ وتىرمىز، – دەدى ا. مولداعاسىموۆا.

سپيكەردىڭ ايتۋىنشا ءدال وسى مەديسينالىق ونىمدەر ءتىزىمىنىڭ باعاسىن اكىمشىلىك وكىلدەرى، جوعارىدا اتالعان دەپارتامەنت پەن وزگە دە مەملەكەتتىك مەكەمەلەر كۇندەلىكتى باقىلاۋدا.

جۇرگىزىلگەن مونيتورينگ اياسىندا قالاداعى بارلىق 8 اۋدان قامتىلعان. بۇگىنگى كۇنى ولار 135 ءدارىحانا ۇيىمىنا باقىلاۋ جاساپ، 5 ءدارىحانادا باعا كوتەرۋ دەرەگىن انىقتاعان.

– 2019 جىلدىڭ 1 ماۋسىمىندا قازاقستان رەسپۋبليكاسىنىڭ دەنساۋلىق ساقتاۋ ءمينيسترى قول قويعان وسى بۇيرىققا توقتالا كەتەيىن. وندا جوعارىدا اتالعان، ساتۋعا تىيىم سالىنعان دارى-دارمەكتەردىڭ بارلىق دەرلىك تۇرلەرىنە شەكتى باعا قاراستىرىلعان. جاۋاپكەرشىلىككە تارتۋ ءۇشىن 5 ءدارىحانا سوتقا جىبەرىلدى، – دەدى سپيكەر.

ايتا كەتەيىك، زاڭبۇزۋشىلىق ءۇشىن 97 مىڭنان 225 مىڭعا دەيىن ايىپپۇل قاراستىرىلعان.

قالالىق شتاب پەن «دولچە فارم» ءوندىرۋشىسىنىڭ اراسىنداعى كەلىسىمشارت نەگىزىندە قالاداعى 70 ءدارىحانا بويىنشا تۇرعىندارعا ارنالعان بەتپەردە جەتكىلىكتى تۇردە ساتىلاتىن بولدى. ەگەر كەشە 164 مىڭ بەتپەردە بولسا، بۇگىندە بەتپەردە سانى 250 مىڭعا جەتىپ وتىر. ءۇش قاباتتى بەتپەردە ءۇشىن باعا ساياساتى 87 تگ بولسا، ال كومىر سۇزگىسىنەن جاسالعان بەتپەردە 111 تگ جانە ءبىر ادامنىڭ قولىنا 10 بەتپەردەدەن ارتىق بەرىلمەيدى.

ساۋدا جانە ينتەگراسيا مينيسترلىگى مەن ۇلتتىق ەكونوميكا جانە دەنساۋلىق ساقتاۋ مينيسترلىكتەرى 7 ساۋىردە «مەديسينالىق بەتپەردەلەردىڭ شەكتى باعاسىن بەكىتۋ تۋرالى» بۇيرىققا قول قويعان بولاتىن. ول بويىنشا ءبىر مەديسينالىق بەتپەردە ءۇشىن بەكىتىلگەن باعا 118 تگ اسپاۋ كەرەك.