الماتى قالاسىنىڭ اكىمى باقىتجان ساعىنتايەۆ دەنساۋلىق ساقتاۋ سالاسىندا 3،5 مىڭنان استام قىزمەتكەردىڭ كوروناۆيرۋسپەن كۇرەستە ەڭبەك ەتىپ جۇرگەنىن الەۋمەتتىك جەلىدەگى پاراقشاسىندا جازدى.
– دارىگەرلەر، مەدبيكەلەر، سانيتارلار مەن فەلدشەرلەر ءوز دەنساۋلىعىنا تونەر قاۋىپكە قاراماستان، ىندەتتىڭ بۇكىل قالاعا تارالىپ كەتپەۋىن قاداعالاۋدا. بۇل كۇندەرى مەدقىزمەتكەرلەردى قولداۋ ماقساتىندا ولاردىڭ جالاقىسىنا ۇستەمە اقى تولەۋ باستالدى. بۇل شەشىمدى مەملەكەت باسشىسىنىڭ تاپسىرماسى بويىنشا مەملەكەتتىك كوميسسيا قابىلداعان ەدى، – دەدى باقىتجان ساعىنتايەۆ.
ونىڭ ايتۋىنشا مۇنداي كومەكتى ءۇش تاۋەكەل توبىنا جاتقىزىلعان مەديسينا قىزمەتكەرلەرى الۋعا قۇقىلى.
– اتاپ ايتقاندا، رەانيماسيا بولىمشەلەرىن قوسا العاندا، ينفەكسيالىق ستاسيونارلاردىڭ دارىگەرلەرى، ورتا جانە كىشى مەديسينالىق قىزمەتكەرلەرى؛ پروۆيزورلىق ستاسيونارلار مەن جەدەل جاردەم؛ كارانتيندىك ستاسيونارلار، سانيتارلىق دارىگەرلەر، جەدەل جاردەم جۇرگىزۋشىلەرى جانە باسقالار. تولەمدەر الەۋمەتتىك مەديسينالىق ساقتاندىرۋ قورىنان كەزەڭ-كەزەڭىمەن جۇزەگە اسىرىلادى، – دەپ جازدى جەلىدەگى پاراقشاسىندا.
سونىمەن قاتار ب. ساعىنتايەۆ عالامات ەڭبەك پەن جانقيارلىق ەرلىكتەرى ءۇشىن اق حالاتتاعى ابزال جاندارعا ريزاشىلىق ءبىلدىردى.
– جۇمىستا قالىپ، سىزدەر، ياكي اق حالاتتاعى ابزال جاندار، بالالارىڭىزبەن تۋعان-تۋىستارىڭىزدى كورمەيسىزدەر. كۇش-جىگەر مەن شىدامدىلىق سەرىك بولسىن. قالا سىزدەردى قولدايدى، – دەپ العىس ايتتى.
پىكىر قالدىرۋ