11 ساۋىردە اۋرۋحانانىڭ ەكى قىزمەتكەرىنەن كوروناۆيرۋس انىقتالعانى حابارلانعان. سول كۇنى بارلىق قىزمەتكەرلەرگە تەست جاسالدى. اۋرۋحانانىڭ گينەكولوگيا ءبولىمىنىڭ دارىگەرى دميتريي سايدىڭ سوزىنشە، 182 مەدقىزمەتكەردىڭ ءاناليزى وڭ ناتيجە كورسەتكەن. دارىگەرلەردى "كوكتەم" شيپاجايى، ءىىم-نىڭ ساناتورييىندەگى پروۆيزورلىق ورتالىقتارعا اپارعان. دارىگەرلەردىڭ ءبىر بولىگى اۋرۋحانادا قالعان.
12 ساۋىردە الماتى قالالىق تاۋارلار مەن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى، قالالىق باس سانيتارلىق دارىگەر ايزات مولداعاسىموۆا جاپپاي جۇقتىرۋ دەرەگىنىڭ ءبىر سەبەبى دارىگەرلەردىڭ ساقتىق شارالارىن ساقتاماۋى ەكەنىن ايتىپ، كىنانى دارىگەرلەردىڭ وزىنە ارتقان.
سانيتارلىق دارىگەردىڭ بۇل سوزدەرىن №12 ورتالىق قالالىق كلينيكالىق اۋرۋحانانىڭ مەدقىزمەتكەرلەرى "نەگىزسىز ايىپتاۋ" دەپ، دەپارتامەنت باسشىسىنىڭ وتستاۆكاسىن تالاپ ەتتى.
– سانيتارلىق دارىگەر ءبىزدى ينديۆيدۋالدىق قورعانىس قۇرالدارىن قولدانبادى، سول ءۇشىن قىلمىستىق جاۋاپكەرشىلىككە تارتۋ كەرەك دەپ ايتتى. كلينيكا قىزمەتكەرلەرى بۇعان تولىقتاي نارازى. ءبىز بۇنىڭ ءبارى وتىرىك ەكەنىن ايتىپ، پرەزيدەنتكە ۇجىمدىق حات جازدىق، – دەدى دميتريي ساي.
گينەكولوگيا ءبولىمىنىڭ مەڭگەرۋشىسى گاۋحار امىرەيەۆا مەن تاعى 33 دارىگەر ايزات مولداعاسىموۆانى سوتقا بەرمەك. ولار "سانيتارلىق دارىگەر بىزگە كۇيە جاقتى" دەپ وتىر.
ونىڭ ايتۋىنشا، دارىگەرلەر توتەنشە جاعداي رەجيمى ەنگەن ساتتەن قورعانىس قۇرالدارىمەن جاراقتاندىرىلعان. اۋرۋحانا ديرەكتورى قالانىڭ سىرتىندا تۇراتىن قىزمەتكەرلەردى تەگىن جاتاقحانامەن، اس-سۋمەن، اۆتوبۋسپەن قامتاماسىز ەتكەن.
ايزات مولداعاسىموۆا informburo.kz تىلشىسىنە "ۆيرۋستى جۇقتىرعاندارىڭىز ءۇشىن وزدەرىڭىز كىنالىسىزدەر دەپ ەشكىم ەشكىمدى ايىپتاعان جوق. مەديكتەر ۇنەمى قاۋىپ-قاتەردىڭ ورتاسىندا جۇرەدى. مەنىڭ سوزدەرىمدى كىمنىڭ، نە دەپ بۇرمالاعانىن بىلمەيمىن. مەن دارىگەرلەر مەن ناۋقاستاردىڭ بارلىعى ساقتىق شارالارىن ساقتاۋ كەرەكتىگىن ايتتىم" دەپ پىكىر بىلدىرگەن.
بۇگىندە تاۋارلار مەن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى ىندەتتىڭ ءورشۋ سەبەبىن انىقتاۋ ءۇشىن اۋرۋحانادا ەپيدەميولوگيالىق تەرگەۋ جۇرگىزۋدە.
تەست ناتيجەسى شىقپاستان دارىگەرلەر نەگە اۋرۋحاناعا جاتقىزىلماق بولدى؟
گاۋحار امىرەيەۆا "مۇنداعىلاردىڭ ءبارى ناۋقاستارمەن بايلانىستا بولعاندار. ءبارىنىڭ ءاناليزى تەرىس ناتيجە كورسەتكەن. مەن بۇل ارەكەتتى ايزات مولداعاسىموۆانى سوتقا بەرەتىنىمىزدى ايتىپ، facebook-قا جاريالاعان جازباممەن بايلانىستىرامىن" دەدى.
گاۋحار امىرەيەۆانىڭ ناتيجەسى تەرىس شىققانىنا قاراماستان، ناۋقاستار جاتقان جەرگە الىپ كەتۋگە تىرىسۋ دەرەگىن ايزات مولداعاسىموۆا "امىرەيەۆانىڭ اناليز قورىتىندىسىن ونىمەن اتتاس ادامنىڭ ناتيجەسىمەن شاتاستىرىپ الىپپىز" دەپ ءتۇسىندىردى.
ونىڭ سوزىنشە، زەرتحاناعا گ.امىرەيەۆا دەگەن 2 ادامنىڭ ناتيجەسى تۇسكەن.
– ونىڭ بىرەۋىندە ناتيجە وڭ. لابورانت دۇرىس جازباعان شىعار، گينەكولوگيا ءبولىمىنىڭ مەڭگەرۋشىسى گاۋحار امىرەيەۆانىڭ ناتيجەسى تەرىس. ونى پروۆيزورلىق ورتالىقتان ەشكىم الىپ كەتپەيدى، – دەدى ول.
ارتىنشا، قالالىق دەنساۋلىق ساقتاۋ باسقارماسىنىڭ باسشىسى تىلەۋحان ابىلدايەۆ پەن دەنساۋلىق ساقتاۋ ۆيسە-مينيسترى كامالجان نادىروۆ كوكتەم ساناتورييىنە كەلىپ، ارىپتەستەرى گاۋحار امىرەيەۆادان جىبەرىلگەن قاتە ءۇشىن كەشىرىم سۇرادى.
كامالجان نادىروۆ سانيتارلىق دارىگەردىڭ سوزىندە قانداي دا ءبىر زاڭ بۇزۋشىلىق انىقتالسا، تيىسىنشە جاۋاپقا تارتىلاتىنىن ايتتى.
اۋرۋحانا قىزمەتكەرلەرى دارىگەرلەردىڭ جاپپاي ۆيرۋس جۇقتىرۋىن ناۋقاستاردى جاتقىزۋدا بەلگىلى ءبىر رەتتىڭ بولماۋىمەن بايلانىستىرادى.
الماتىدا ەكى پروۆيزورلىق ستاسيونار بار. كوروناۆيرۋس كۇدىگىنە ىلىنگەندەر سول ستاسيونارعا جاتقىزىلۋعا ءتيىس. الايدا مەديكتەردىڭ ايتۋىنشا، پنيەۆمونيامەن اۋىرعانداردى №12ورتالىق قالالىق كلينيكالىق اۋرۋحاناسىنا، №4، №7 قالالىق كلينيكالىق اۋرۋحانالارعا جەتكىزگەن. وسىلايشا، پروۆيزورلىق ستاسيونارلار كارانتيندىك ستاسيونارعا اينالعان.
– قوعامدىق دەنساۋلىق ساقتاۋ باسقارماسىنىڭ پۋلمونولوگيالىق ناۋقاستار مەن رەسپيتاتورلىق-ۆيرۋستىق بەلگىلەرى بار پاسيەنتتەردى بىرگە جاتقىزۋ تۋرالى بۇيرىعى باياۋ ارەكەت ەتەتىن مينا ىسپەتتەس ەدى. ءبىزدىڭ تالاپتارعا قۇلاق اسقان ەشكىم بولمادى، – دەدى №12 ورتالىق قالالىق كلينيكالىق اۋرۋحاناسىنىڭ بۇرىنعى باس دارىگەرى الماز جۇباشە facebook پاراقشاسىندا.
№12 ورتالىق قالالىق كلينيكالىق اۋرۋحاناسى دارىگەرلەردى كوروناۆيرۋستان قورعاۋ ءۇشىن جەكە پروۆيزورلىق ءبولىم اشىپ، Covid-19 اناليزدەرىن سول جەردە العان.
– بىزگە تاۋلىگىنە 200-300 ناۋقاس جۇگىنەدى. قالاداعى ەكى كلينيكانىڭ جابىلۋىنا بايلانىستى ولاردىڭ سانى ەسەلەپ ارتتى. ءار ناۋقاسقا 1-2 ادام ەرە كەلەدى. ءار ناۋقاس وزىمەن بىرگە ۆيرۋس اكەلگەن بولۋى مۇمكىن. ەمدىك شارالار بارىسىندا ناۋقاسپەن جاقىن بايلانىسقا تۇسۋگە تۋرا كەلەدى. جەكە قورعانىس قۇرالى مۇندايدا ۆيرۋستىڭ جۇعۋىنان 100 پايىزعا قورعاي المايدى. كوروناۆيرۋس ءاناليزىنىڭ قورىتىندىسى شىققانشا ناۋقاستى عيماراتقا كىرگىزبەي تۇرۋعا تاعى بولمايدى، – دەلىنگەن الماز جۇباشيەۆ جازباسىندا.
ونىڭ پىكىرىنشە، ۆيرۋس جۇقتىرعاندار اراسىندا حيرۋرگيا ءبولىمىنىڭ ماماندارى دا بار.
– زەرتتەۋ بارىسىندا وتكىر حيرۋرگيالىق پاتولوگياسى بار ناۋقاستاردان وڭ ناتيجە انىقتالعان. كلينيكالىق كارتينا حيرۋرگيالىق سىرقاتتاردىڭ سالدارىنان بىردەن كورىنبەگەن بولۋى مۇمكىن. قىزمەتكەرلەرگە كوروناۆيرۋس وسىنداي ناۋقاستاردان دا جۇعۋى ىقتيمال، – دەدى ول.
تەراپيا ءبولىمىنىڭ مەڭگەرۋشىسى گاۋحار جالەلوۆا قابىلداۋ ءبولىمى دارىگەرلەرىنىڭ جۇكتەمەسى تىم اۋىر بولعانىن ايتتى.
– بىزگە قىزۋى بار ناۋقاستاردى تالعاردان جەتكىزىپ جاتتى. مەنىڭ تەراپيەۆتەرىم قاتەرگە باس تىكتى. سوندىقتان ولارعا ارناپ جەكە كىرەتىن ەسىك، كابينەت، پالاتا ازىرلەندى. وندا Covid-19 كۇدىگى بويىنشا تۇسكەندەر قارالدى. تەست ناتيجەسىن ءۇش كۇن توستىق. اناليز جاساپ بولعانشا باياۋ جارىلاتىن مينانىڭ ۇستىندە وتىردىق، – دەيدى ءبولىم مەڭگەرۋشىسى.
ال بۇگىن، 15 ساۋىردە №12 ورتالىق قالالىق كلينيكالىق اۋرۋحاناسىنىڭ باس دارىگەرى الماز جۇباشيەۆتىڭ ءوز ەركىمەن قىزمەتىنەن كەتكەنى بەلگىلى بولدى.
الماتى قالالىق دەنساۋلىق ساقتاۋ باسقارماسىنىڭ باسشىسى تىلەۋحان ابىلدايەۆ "باس دارىگەر ۇيىمداستىرۋدا كەتكەن قاتەلىكتەرىن ءبىلىپ، ءوز ەركىمەن قىزمەتتەن كەتكەن بولۋى مۇمكىن" دەپ توپشىلايدى.
الماز جۇباشيەۆتىڭ ءوزى قىزمەتتەن كەتۋىنە بايلانىستى پىكىر بىلدىرگەن جوق.
ال اۋرۋحانا دارىگەرلەرى بەينەۇندەۋ ءتۇسىرىپ، الماز جۇباشيەۆتى قايتىپ اكەلۋدى تالاپ ەتۋدە.
پىكىر قالدىرۋ