الماتى قالاسىنىڭ وڭىرلىك كوممۋنيكاسيالار قىزمەتى الاڭىندا وتكەن بريفينگ بارىسىندا دەنساۋلىق ساقتاۋ ۆيسە-مينيسترى قامالجان نادىروۆ مەديسينا قىزمەتكەرلەرىنىڭ كوروناۆيرۋستىق ينفەكسيانى جۇقتىرۋىمەن بايلانىستى جاعدايعا تۇسىنىكتەمە بەردى.

بۇعان دەيىن مەديسينا قىزمەتكەرلەرى اراسىندا كوروناۆيرۋستىق ينفەكسيانى جۇقتىرۋ فاكتىلەرى تۋرالى حابارلانعان بولاتىن.

دەنساۋلىق ساقتاۋ ۆيسە-مينيسترىنىڭ ايتۋىنشا، بۇگىن وسى جاعداي بويىنشا جۇمىس كوميسسياسى قۇرىلىپ، قىزمەتتىك تەكسەرۋ جۇرگىزىلۋدە.

وعان قوسا، ق. نادىروۆ الماتى قالالىق ورتالىق كلينيكالىق اۋرۋحاناسىنىڭ باس دارىگەرىن جۇمىستان بوساتۋ تۋرالى جاعدايعا تۇسىنىكتەمە بەردى. مەديسينالىق ۇيىمنىڭ باسشىسى – قوعامدىق دەنساۋلىق باسقارماسىنىڭ قۇزىرىنداعى شتاتتىق بىرلىك.

– مەنىڭ بىلۋىمشە، باس دارىگەر ءوز ەركىمەن ءوتىنىش جازدى. ءبىز سىزدەرمەن قۇقىقتىق مەملەكەتتە ءومىر ءسۇرىپ جاتىرمىز. ەڭبەك كودەكسىن دە، مەملەكەتتىك قىزمەتكەرگە دەگەن قارىم-قاتىناستى دا ەشكىم الىپ تاستاعان جوق. سوندىقتان، ەگەر بىرەۋدە قانداي دا ءبىر سۇراق تۋىنداعان بولاتىن بولسا، ءبىز ولاردى قۇقىقتىق الاڭدا قاراستىرۋىمىز كەرەك، – دەپ ءتۇسىندىردى ول.

مەديسينا قىزمەتكەرلەرىنىڭ ينفەكسيا جۇقتىرۋى مۇمكىن دەگەن سەبەپتىڭ ءبىرى – ينفەكسيا ناۋقاستان دارىگەرگە نەمەسە دارىگەردەن ناۋقاسقا بەرىلگەن بولۋى كەرەك. ەپيدەميولوگ مامانداردىڭ ايتۋىنشا، مەديسينالىق ۇيىمدار قاۋىپ-قاتەر ايماعىندا جۇمىس ىستەيتىندىكتەن، اۋرۋحاناىشىلىك ينفەكسيانىڭ بەرىلۋ جاعدايىنىڭ بولماۋى مۇمكىن ەمەس.

– ورىن العان جاعدايلار، وكىنىشكە وراي، مەديسينا قىزمەتكەرلەرى ارقىلى دا بەرىلۋى مۇمكىن. نەمەسە كەرىسىنشە، ەگەر ەپيدەميولوگيا نورمالارى ساقتالماي، مەديسينالىق ۇيىم ىشىندەگى لوگيستيكانىڭ بۇزىلۋى سالدارىنان بولۋى دا عاجاپ ەمەس. سوندىقتان بۇل جايتتەرگە سابىرمەن جانە تۇسىنىستىكپەن قاراۋ كەرەك. ءبىزدىڭ مىندەتىمىز – ورىن العان جاعدايدىڭ سەبەبى مەن سالدارىن تابۋ. تاعى دا ايتايىن، بۇل جاعداي دەنساۋلىق ساقتاۋ مينيسترلىگىنىڭ جەكە باقىلاۋىندا، – دەدى ق. نادىروۆ.

قورىتىندىلاي كەلە، ق. نادىروۆ مەديسينالىق ۇيىمداردا قىزمەتكەرلەردىڭ سانيتارلىق-ەپيدەميولوگيالىق قاۋىپسىزدىك شارالارىن ساقتاۋىنا باقىلاۋ جۇرگىزىلەتىنىن اتاپ ءوتتى. گوسپيتال ىشىندەگى قاۋىپسىزدىكتى باقىلاۋدى ساقتاۋ – بۇل ەپيدەميا مەن پاندەميا كەزەڭىندەگى نەگىزگى تالاپتاردىڭ ءبىرى – دەدى ول.