قازاقستان پرەزيدەنتى، قارۋلى كۇشتەردىڭ جوعارعى باس قولباسشىسى قاسىم-جومارت توقايەۆ ەلوردادا اسكەري جيىنعا شاقىرىلعان اۋماقتىق قورعانىس بريگاداسىنىڭ اسكەري قىزمەتشىلەرىمەن كەزدەستى دەپ جازادى Qamshy.kz اقپارات اگەنتتىگى اقوردانىڭ دەرەگىن نەگىزگە الىپ. سونداي-اق قارۋلى كۇشتەردىڭ تەحنيكالىق دايىندىعىن جانە قالا اكىمدىگىنىڭ توتەنشە جاعدايدى قامتاماسىز ەتۋ جونىندەگى جۇمىسىن تەكسەردى.

قورعانىس ءمينيسترى نۇرلان ەرمەكبايەۆ قارۋلى كۇشتەردىڭ جوعارعى باس قولباسشىسىنا ەلىمىزدەگى اسكەري قىزمەتىن وتەۋگە مىندەتتى ازاماتتاردى ارنايى جيىنعا شاقىرۋ بارىسى، كوروناۆيرۋس پاندەمياسىنا قارسى كۇرەستە اسكەري قىزمەتشىلەردىڭ تەحنيكالىق جانە جاۋىنگەرلىك جابدىقتالۋى تۋرالى باياندادى.

نۇر-سۇلتان قالاسىنىڭ اكىمى التاي كولگىنوۆ ەلوردانىڭ قازىرگى احۋالى، ونىڭ ىشىندە، ازىق-تۇلىكپەن، مەديسينالىق قورعانىس قۇرالدارىمەن قامتاماسىز ەتۋ، قالادا دەزينفەكسيا جۇمىستارىن جۇرگىزۋ، قوسىمشا جۇقپالى اۋرۋلار اۋرۋحاناسىن سالۋ جايىندا ەگجەي-تەگجەيلى ەسەپ بەردى.

قاسىم-جومارت توقايەۆ مينيستر مەن اكىمنىڭ ەسەپتەرىن تىڭداعاننان كەيىن دەزينفەكسيالاۋ جۇمىستارىنا ەرەكشە ءمان بەرۋدى تاپسىردى. مۇنداي جۇمىستار، اسىرەسە، ءىرى قالالاردا كەڭ كولەمدە جۇرگىزىلۋى كەرەك.

 – نىسانداردى كۇزەتۋ، كوشەدەگى ءتارتىپتى ساقتاۋ اسا ماڭىزدى مىندەت ەكەنى تۇسىنىكتى. دەگەنمەن، قازىرگى جاعدايدا باستى مىندەت – دەزينفەكسيا جاساۋ. بۇل – وتە ءقاۋىپتى ۆيرۋس. سوندىقتان دەزينفەكسيا جاساماسا، ەشقانداي وڭ ناتيجە بولمايدى، – دەدى پرەزيدەنت.

مەملەكەت باسشىسى توتەنشە جاعداي رەجيمىنىڭ بارلىق تالاپتارىن بۇلجىتپاي ورىنداۋ قاجەت ەكەنىن ايتتى.

– شاعىن بيزنەستى شىعارامىز دەپ جاتىرمىز. جالپى قالانىڭ تۇرعىندارى كارانتين رەجيمىن مىندەتتى تۇردە ساقتاۋى كەرەك. ونسىز بولمايدى، – دەدى قاسىم-جومارت توقايەۆ.

مەملەكەت باسشىسى الەۋمەتتىك مىندەتتەمەلەردى ورىنداۋدىڭ جانە مەديسينا قىزمەتكەرلەرىنە سىياقى تولەۋدىڭ ماڭىزدى ەكەنىن اتاپ ءوتتى. سونىمەن قاتار جاڭا جۇقپالى اۋرۋلار ەمحاناسىن سالۋ ماسەلەسىنە ارنايى توقتالدى.

– كەلەسى اپتادا اتالعان ەمحانانى بارىپ كورەمىز. بۇل ەمحانا وتە قىسقا مەرزىمدە سالىنىپ جاتىر. ونىڭ قۇرىلىسى بار-جوعى ەكى اپتانىڭ ىشىندە ءبىتۋى كەرەك. ەڭ الدىمەن، ونىڭ ساپاسىنا ەرەكشە ءمان بەرۋ قاجەت، – دەدى پرەزيدەنت.

قاسىم-جومارت توقايەۆ جيىنعا شاقىرىلعان اسكەري قىزمەتشىلەردىڭ الدىندا سويلەگەن سوزىندە ولاردىڭ ەل ءۇشىن قىزمەت ەتۋگە كەلگەندەرىنە ريزاشىلىعىن ءبىلدىردى.

– بارشاڭىزعا شىنايى العىسىمدى بىلدىرەمىن. سىزدەر وتە ماڭىزدى جۇمىس اتقارىپ جاتسىزدار. بۇل – ناعىز ءپاتريوتيزمنىڭ كورىنىسى. ءقازىر ادامداردىڭ كوبى پاتريوتيزم، وتانعا دەگەن سۇيىسپەنشىلىك تۋرالى كوپ اڭگىمە ايتادى. ءبىراق ناقتى ىسكە كەلگەندە بۇعىپ قالادى. ال سىزدەر ەلىمىز، وتانىمىز ءۇشىن ءوز ەرىكتەرىڭىزبەن وسىندا قىزمەت ەتۋگە كەلىپ وتىرسىزدار. سوندىقتان بارشاڭىزعا شىن جۇرەكتەن العىس ايتامىن، – دەدى جوعارعى باس قولباسشى.

پرەزيدەنت حالقىمىزدىڭ وسى ۋاقىتشا قيىندىقتى ەڭسەرەتىنىنە سەنىم ءبىلدىردى.

– قازىرگى احۋال كۇردەلى. ءبىراق ءبارىمىز ءبىر ۇلت، ءبىر حالىق بولىپ وسى قيىندىقتاردى جەڭىپ شىعاتىنىمىزعا ەشقانداي كۇمانىم جوق. ءبارى جاقسى بولادى. ءبىز، ەڭ الدىمەن، قاراپايىم حالىققا كومەك كورسەتىپ جاتىرمىز. بيۋدجەتتەن، ۇلتتىق قوردان قىرۋار قارجى ءبولىندى. ەڭ الدىمەن ءبىزدىڭ الدىمىزدا تۇرعان ماقسات – قاراپايىم حالىققا كولداۋ كورسەتۋ. حالىقسىز ەشقانداي ەكونوميكا بولمايدى. سوندىقتان پاتريوتيزم دەگەن بۇل قاسيەتتى ۇعىمدى ناقتى ىسپەن دالەلدەۋ كەرەك، – دەدى قاسىم-جومارت توقايەۆ.