ق ر قارجى نارىعىن رەتتەۋ مەن دامىتۋ اگەنتتىگى ءتوراعاسىنىڭ ءبىرىنشى ورىنباسارى ولەگ سمولياكوۆ توتەنشە جاعداي كەزىندە شاعىن جانە ورتا بيزنەس وكىلدەرىنە جەڭىلدىكپەن نەسيە بەرۋ باعدارلاماسى ىسكە اسىرىلىپ جاتقىندىعىن ونلاين-بريفينگتە اتاپ ايتتى.

سپيكەر ءسوزىنىڭ باسىندا بانك سەكتورى بۇگىنگى داعدارىستى جاعدايلارعا بارىنشا دايىن بولعانىن اتاپ ءوتتى.

بۇگىنگى پاندەميا جاعدايىندا، كارانتيندىك رەجيم كەزىندە سۇرانىستىڭ، تابىس كوزدەرىنىڭ تومەندەۋىنە، كاسىپورىندار قىزمەتىنىڭ ۋاقىتشا توقتاتىلۋىنا بايلانىستى ەكونوميكانىڭ نەگىزگى سەكتورىنا جانە قارجى سەكتورىنا اسەر ەتەتىن جاڭا قاتەرلەر تۋىندايتىنى اقيقات.

سپيكەر كوروناۆيرۋس پاندەمياسىنا جول بەرمەي، بيزنەستى قارجىلىق جاعىنان قولداۋ جانە قارىز الۋشىلاردىڭ بورىشقا باتىپ قالماۋى ءۇشىن داعدارىسقا قارسى قوسىمشا شارالار قابىلدانعانىن اتاپ ءوتتى.

2020 جىلدىڭ 30 ناۋرىزىنان 30 قىركۇيەگىنە دەيىنگى كەزەڭگە پرۋدەنسيالىق رەتتەۋدىڭ ۋاقىتشا كونترسيكلدىق شارالارى ەنگىزىلدى.

شوب-عا جەڭىلدىكپەن نەسيە بەرۋ باعدارلاماسى ازىرلەنىپ، ىسكە اسىرىلۋدا، وعان 600 ملرد تگ ءبولىندى.

– كوروناۆيرۋس ينفەكسياسىنىڭ پاندەمياسىنا جانە ونىڭ قازاقستان ەكونوميكاسىنا تيگىزىپ وتىرعان زاردابىنا بايلانىستى توتەنشە جاعداي سالدارىنان زارداپ شەككەن شاعىن جانە ورتا بيزنەس سۋبەكتىلەرىن، جەكە كاسىپكەرلەردى قولداۋ ءۇشىن قازاقستان رەسپۋبليكاسى پرەزيدەنتىنىڭ تاپسىرماسى بويىنشا ۇلتتىق بانك اگەنتتىگىمەن بىرلەسىپ شوب سۋبەكتىلەرىنە جەڭىلدەتىلگەن نەسيە بەرۋ باعدارلاماسى ازىرلەندى، – دەدى ول.

سپيكەردىڭ سوزىنە سۇيەنسەك، باعدارلاما ەكىنشى دەڭگەيلى بانكتەردىڭ شوب سۋبەكتىلەرىنە، ونىڭ ىشىندە توتەنشە جاعداي كەزىندە زارداپ شەككەن جەكە كاسىپكەرلەرگە اينالىم كاپيتالىن تولىقتىرۋعا 12 ايعا 8% جەڭىلدىكتى نەسيەلەر بەرۋ جولىمەن ىسكە اسىرىلادى.

باعدارلاماعا قاتىسۋشى بانكتەرگە بولىنگەن قاراجاتتى مەملەكەتتىك جانە مەملەكەتتىك ەمەس باعالى قاعازداردى ساتىپ الۋعا، باسقا بانكتەرگە دەپوزيتتەرگە ورنالاستىرۋعا، شەتەل ۆاليۋتاسىن ساتىپ الۋعا تىيىم سالىنادى.

وسى جىلدىڭ 14 ساۋىرىندەگى جاعداي بويىنشا، ياعني باعدارلامانى ىسكە اسىرۋ ساتىنەن باستاپ 12 كۇن ىشىندە شاعىن جانە ورتا بيزنەس سۋبەكتىلەرىنەن 213،9 ملرد تگ سوماسىنا 1 131 ءوتىنىم كەلىپ تۇسكەن، ونىڭ ىشىندە 41،7 ملرد تگ سوماسىنا 92 ءوتىنىم ماقۇلدانعان.