باتىس باسىلىمدارىندا ۋحاننىڭ قۇپيا ۆيرۋسولوگيا ينستيتۋتىنىڭ فوتولارى جارىسا جاريالاندى. بۇل تۋرالى Daily Mail، The Sun، The Express جانە The Washington Post گازەتتەرىنە شولۋ جاساعان قامشى ءتىلشىسى حابارلايدى.

"جاريالانعان فوتولارداعى زەرتحانا ىشىندە 1500 ءتۇرلى ۆيرۋستىڭ شتاممدارىن ساقتايتىن توڭازىتقىشتار كورسەتىلگەن. توڭازىتقىشتاردىڭ ءبىرىنىڭ ەسىگىندە سىنعان پلومبا بايقالادى. ولاردىڭ ىشىندە جانۋارلاردان ادامعا جۇققان جارعانات كوروناۆيرۋسى سياقتى جويقىن اسەرگە يە ۆيرۋستار ساقتالۋى مۇمكىن"  دەپ جازادى Daily Mail.

The Sun گازەتىنىڭ جازۋىنشا، بۇل سۋرەتتەردى قىتايدىڭ China Daily گازەتى 2018 جىلى جاريالاعان. الايدا، كەيىن وشىرگەن. سۋرەتتەر وشىرىلگەننەن كەيىن، وتكەن ايدا الەۋمەتتىك جەلىلەردە، اسىرەسە، Twitter پاراقشالارىندا جاريالانعان.

بريتاندىق The Mail باسىلىمى دا كوروناۆيرۋستىڭ زەرتحانادان شىعۋ مۇمكىندىگىن جازعان.

اقش مەملەكەتتىك حاتشىسى مايك پومپەو جاقىندا بەيجىڭنەن ۆيرۋستىڭ زەرتحانادان شىققان-شىقپاعانىن انىقتاۋدى تالاپ ەتكەن. ول: "ءبىز بۇل تۋرالى كوپ نارسە ءبىلۋىمىز كەرەك. اقش ۇكىمەتى ونى انىقتاۋ ءۇشىن بار كۇشىن سالىپ جاتىر" دەگەن.

ول قىتايلىق تاراپقا ىنتىماقتاستىق ورناتۋدىڭ ەڭ جاقسى جولدارىنىڭ ءبىرى "الەممەن بىرلەسىپ، الەم عالىمدارىنا بۇل ۆيرۋستىڭ قالاي پايدا بولعانىن، قالاي تارالا باستاعانىن بىلۋگە مۇمكىندىك بەرۋ" ەكەنىن ايتقان.

2018 جىلى جارعانات كوروناۆيرۋسىن زەرتتەپ جاتقان ۋحان زەرتحاناسى تۋرالى اقش ديپلوماتتارىنىڭ ەسكەرتۋلەرىن ۆاشينگتون پوست گازەتى جاريالاعاننان كەيىن كۇدىك ءتىپتى دە كۇشەيە تۇسكەن. ديپلوماتتار اقش مەملەكەتتىك دەپارتامەنتىنە بۇل زەرتحانادان SAR-عا ۇقساس جاڭا پاندەميا تارالۋى مۇمكىن ەكەنىن ايتقان.

اقش بارلاۋ دەرەككوزدەرىنىڭ ايتۋىنشا، كوروناۆيرۋستىڭ ءورشۋى باستالعاننان كەيىن كوپ ۇزاماي زەرتحانا قىزمەتكەرلەرى ۆيرۋستىڭ ۇلگىلەرىن جويىپ، ەسەپتەر مەن اكادەميالىق قۇجاتتاردى وشىرگەن. سودان كەيىن جابايى جانۋارلار ساتىلاتىن ۋحاننىڭ جابايى جانۋارلار بازارىنا كىنا تاعۋعا تىرىسقان.

دەرەككوزدەردىڭ پىكىرىنشە، "ءنولىنشى ناۋقاس" (ەڭ العاشقى ۆيرۋس جۇقتىرعان ادام) زەرتحانادا پراكتيكانت بولعان، ول ءوزىنىڭ جىگىتىنە جۇقتىرعاننان كەيىن جەرگىلىكتى تۇرعىندارعا ۆيرۋس تاراتقان كورىنەدى.

"بەيجىڭنىڭ سويىلىن سوعادى" دەگەن ايىپتارعا تاپ بولعان دۇنيەجۇزىلىك دەنساۋلىق ساقتاۋ ۇيىمى پاندەمياعا قاتىستى بەيجىڭنىڭ "ۆيرۋس جابايى جانۋارلار بازارىنان تارادى" دەگەن تەورياسىن تەز قابىلدادى جانە ناسيحاتتادى.

ىلعال بازار (جانۋارلار بازارى) تەورياسىن العاش قابىلداعاننان كەيىن دە اقش، ۇلىبريتانيا جانە كاناداداعى بارلاۋ قىزمەتكەرلەرى ۋحان ينستيتۋتىنا كوبىرەك كوڭىل بولە باستاعان.

بريتان ۇكىمەتىنىڭ دەرەككوزدەرى ايعاقتامالار ۆيرۋستىڭ "زوونوزدى" جانۋاردان شىققاندىعىن كورسەتەدى دەپ تۇجىرىمداعان. كوروناۆيرۋستى زەرتحانادا زەرتتەگەن بريتاندىق عالىمدار ۆيرۋس بەلگىسىز اپاتتىڭ سالدارىنان ادامدارعا جۇققان دەگەن تەوريانى قۇپتاپ وتىر.

ال، بەيسەنبىدە G7 ەلدەرىنىڭ ونلاين كەزدەسۋىنەن كەيىن فرانسيا پرەزيدەنتى ەممانۋەل ماكرون پاندەميا تۋرالى "ءبىز بىلمەيتىن وقيعالار ءالى كوپ" دەگەن.

بۇل تۋرالى اقش پرەزيدەنتى دونالد ترامپت وتكەن اپتاداعى باسپا ءسوز كونفەرەنسياسىندا بەلگىسىز اپات سالدارىنان ۆيرۋستىڭ زەرتحانادان تارالۋ تەورياسى تۋرالى سۇراق قويىلعاندا،  "ءبىز بۇل قورقىنىشتى جاعدايدى مۇقيات زەرتتەپ جاتىرمىز" دەپ جاۋاپ بەرگەن.

ال، بۇگىن The Express باسىلىمى: "ۋحانداعى سىرلى لابوراتوريانىڭ" ءرولىن زەرتتەپ جاتقان اقش ماماندارى مەن بارلاۋ قىزمەتكەرلەرىنە ۇلىبريتانيالىقتار دا قوسىلدى" دەپ جازدى.

باسىلىمنىڭ جازۋىنشا، ۇلىبريتانيا، اقش، فرانسيا قوسىلىپ، كوروناۆيرۋستىڭ تارالۋى مەن جۇمباق شىعۋ تەگىن جاسىرۋعا تىرىسقان بەيجىڭدى سىناعان.