ۋكراينالىق بەلگىلى "ءورول ي رەشكا" باعدارلاماسىنىڭ كەزەكتى تۇسىرىلىمدەرىنىڭ بىرىنە نيۋ-يوركتە تۇراتىن قازاقستان ازاماتى دانيار كوجان ءتۇستى.

ول نيۋ-يوركتىڭ پاندەميا كەزىندەگى تىنىس-تىرشىلىگى، اۋرۋحانالارداعى جاعداي، جالپى ەپيدەميولوگيالىق احۋال تۋرالى بايان ەتكەن.

دانيار كوجان الماتى قالاسىنىڭ تۋماسى. قازاق گۋمانيتارلىق زاڭ ۋنيۆەرسيتەتىن "قۇقىقتانۋ" ماماندىعى بويىنشا بىتىرگەن. ءقازىر نيۋ-يوركتە "Ballon Stoll Bader" زاڭگەرلىك كومپانياسىنىڭ پيار-مەنەدجەرى بولىپ جۇمىس ىستەيدى.

ونىڭ سوزىنشە، تۇسىرىلىمگە قاتىسۋ ۇسىنىسى "ءورول ي رەشكا" باعدارلاماسى  رەداكسياسىنىڭ تاراپىنان بولعان.

– 12 ءساۋىر كۇنى Instagram پاراقشاما "ورەل ي رەشكا" باعدارلاماسىنىڭ رەداكسياسىنان حابارلاستى. ولار مەنىڭ نيۋ-يوركتەگى قىزىقتى جازبالارىمدى كورىپتى. مۇنداعى جاعداي "وتە قيىن" دەگەندى ەستىپ، قالانىڭ قازىرگى ءومىرىن ءتۇسىرىپ جىبەرۋدى سۇرادى. تۇسىرىلىمدە نيۋ-يوركتىڭ تانىمال كوشەلەرىن، دارىگەرلەردىڭ جۇمىسىن، ۋاقىتشا قۇرىلعان اۋرۋحانالاردى كورسەتۋگە تىرىستىم، – دەيدى دانيار.

دانيار بۇعان دەيىن قازاقستاندىق تەلەارنالاردا جۋرناليست، پروديۋسەر بولىپ جۇمىس ىستەگەن. ءوزىنىڭ ايتۋىنشا، ساياحاتتاعاندى بۇرىننان جاقسى كورەدى.

– ءوزىم ساياحاتتاعاندى جاقسى كورەمىن. ازىرگە 15 مەملەكەتتە بولدىم. امەريكاعا انام ەكەۋمىز كەلىپ، شتاتتاردى ارالاعانبىز. وسىلايشا، زاڭگەرلىك كومپانيادان ۇسىنىس ءتۇسىپ، پيار-مەنەدجەر قىزمەتىنە قابىلداندىم، – دەپ اتاپ ءوتتى.

دانيار ايگىلى بوكسشى مايك تايسونمەن سۇحباتتاسقان.

– ومىرىمدەگى ماڭىزدى ماتەريالداردىڭ ءبىرى – تانىمال بوكسشى مايك تايسونمەن بولعان ەكسكليۋزيۆتى ينتەرۆيۋ دەر ەدىم. "ورەل ي رەشكا" باعدارلاماسىن تۇسىرگەندە دە ءوزىم وپەراتور، ءوزىم مونتاجەر بولدىم. ونىڭ ءماتىنىن جازۋعا قازاقستاندىق جۋرناليست انار ۇمبەتوۆا كومەكتەستى. ءقازىر انار دا امەريكادا تۇرادى. نيۋ-يورك تۋرالى شىعارىلىمعا وتە جاقسى لەبىزدەر كەلىپ جاتىر. باعدارلامانىڭ باس پروديۋسەرى ەلەنا سينەلنيكوۆا حابارلاسىپ، العىس ءبىلدىردى. ەندى نيۋ-يورك تۋرالى كەلەسى شىعارىلىمدى ازىلەپ جاتىرمىز. وندا حالىقتىڭ كوروناۆيرۋس ينفەكسياسىنان جازىلعانىن كورسەتەرىمىزگە ۇمىتتەنەمىن، – دەيدى نيۋ-يوركتە جۇمىس ىستەيتىن قازاقستان ازاماتى.

دانيار تۇسكەن ءسات ۆيدەونىڭ 4 مينۋتىنان باستالادى.