الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين توتەنشە جاعداي كەزىندەگى ءدىني ءىس-شارالاردى ۇيىمداستىرۋ ءتارتىبى تۋرالى ايتتى. بۇل تۋرالى almaty-akshamy.kz مالىمدەدى. 

– قازاقستان مۇسىلماندارى ءدىني باسقارماسى ەلىمىزدەگى توتەنشە جاعدايعا بايلانىستى، قاسيەتتى رامازان ايىندا ىندەتتىڭ تارالىپ كەتپەۋى ءۇشىن كارانتين كەزىندە تاراۋىق نامازى مەشىتتەرىمىزدە جاماعاتپەن وقىلمايتىنىن مالىمدەدى. ءبىز بارشانىڭ اماندىعى ءۇشىن جاسالىپ وتىرعان بۇل قادامدى تولىعىمەن قۇپتايمىز. سوندىقتان تاراۋىق نامازىن ءوز شاڭىراعىڭىزدا، وتباسى مۇشەلەرىمەن وقۋعا كەڭەس بەرەمىز. ءبىز وسىلاي وقشاۋلانۋ ارقىلى جۇقپالى ىندەتتىڭ جولىن كەسەمىز، – دەدى الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين.

سونىمەن قاتار، سپيكەر قازاقستان مۇسىلماندارى ءدىني باسقارماسى ءقاۋىپتى ىندەتتىڭ تارالىپ كەتپەۋى ماقساتىندا مەشىتتەردە، ءدامحانالاردا، قوعامدىق ورىنداردا، تاعى دا باسقا مەكەمەلەردە جينالىپ اۋىزاشار بەرۋدى ۋاقىتشا توقتاتۋ كەرەكتىگىن ايتتى.

– رامازان ايى كەلىسىمەن كوبىمىز اۋىزاشار بەرۋگە اسىعامىز. اۋىزاشار بەرۋ – مۇسىلمان قاۋىمى ءۇشىن ماڭىزى زور ساۋاپتى ىستەردىڭ ءبىرى. دەگەنمەن، ءبىز ۇيگە دە ادامداردىڭ باسىن قوسىپ، اۋىزاشار بەرۋگە ۇزىلدى-كەسىلدى قارسىمىز. قاسيەتتى اي كەزىندە مۇسىلمان باۋىرلار ءوزىنىڭ اعايىن-تۋىسىنا، دوستارىنا، تانىستارىنا اۋىزاشار بەرۋ پارىزىن ورىنداعىسى كەلسە، اس ءمازىرىن ۇيلەرىنە جەتكىزىپ بەرۋىنە بولادى. ول ءۇشىن ازىق-تۇلىك ونىمدەرى ساپالى، تازا، مىندەتتى تۇردە ورالىپ، قاپتالعان بولۋى كەرەك جانە تاسىمالداۋ ءۇشىن قالاداعى كلينينگتىك كومپانيالار قىزمەتىن پايدالانعان ابزال. سونداي-اق، الەۋمەتتىك قولداۋعا مۇقتاج جاندارعا دا وسىنداي جولمەن كومەك قولىن سوزۋعا بولادى، – دەدى ج.بەكشين.

قالانىڭ مەملەكەتتىك باس سانيتارلىق دارىگەرى ناماز كەزىندە دە، اۋىزاشار ۋاقىتىندا دا جەكە باستىڭ سانيتارلىق-گيگيەنالىق تازالىعىن قاتاڭ ساقتاۋ كەرەكتىگىن ەسكەرتتى.

وسى ورايدا ايتا كەتەيىك، رامازان ايىندا جاماعاتتىڭ كەز-كەلگەن ساۋالىنا دەر كەزىندە جاۋاپ بەرۋ ءۇشىن 33-30-30 ءنومىرلى call-ورتالىق اشىلعان. بۇل ورتالىققا نۇر-سۇلتان قالاسىنىڭ كودى ارقىلى قوڭىراۋ سوعۋعا بولادى. سall-ورتالىقتا ءدىن سالاسىنىڭ بىلىكتى ماماندارى تاۋلىك بويى قازاق جانە ورىس تىلىندەگى سۇراقتارعا جاۋاپ بەرەتىن بولادى.