قمدب ءتوراعاسىنىڭ ورىنباسارى ەرشات وڭعاروۆ توتەنشە جاعداي كەزىندە قازاقستاندىقتار ءپىتىر ساداقاسىن موبيلدىك قوسىمشالار ارقىلى بەرۋىنە بولاتىنىن ايتتى. بۇل تۋرالى اlmaty.tv حابارلادى.
بيىلعى جىلى ءپىتىر ساداقانىڭ مولشەرى 370 تەڭگە دەپ بەكىتىلدى. ونىڭ قۇنى ەكى كەلى ۇننىڭ رەسپۋبليكا بويىنشا ەسەپتەگەندە نارىقتىق ورتاشا باعاسىمەن شىعارىلدى. بۇل – ەڭ تومەنگى مولشەرى. الايدا ماتەريالدىق جاعدايى بار ازاماتتار مەيىز نەمەسە قۇرما قۇنىمەن بەرسە دە بولادى. ال، توتەنشە جاعداي مەن كارانتين رەجيمىندە ءپىتىر ساداقانى ۇيدەن شىقپاي-اق بەرۋ ءۇشىن مۇمكىندىك بار.
– رامازان ايىندا بەرىلەتىن ءپىتىر ساداقاسى مەن زەكەتتى كاسپيي بانكى جانە حالىق بانكى، كيۆي ءموبيلدى قوسىمشالارى ارقىلى اۋدارۋعا بولادى. قازىرگى تاڭدا باسقا دا بانكتەرمەن كەلىسسوزدەر جۇرگىزىلىپ جاتىر. قازاقستان مۇسىلماندارى ءدىني باسقارماسى بەلگىلى ءبىر بانكتى جارنامالامايدى. الايدا مىنا توتەنشە جاعدايدا ۇيدەن شىقپاي، ساداقا بەرۋدىڭ وسىنداي وڭتايلى جولىن تاڭداپ وتىرمىز، – دەدى نايم ءمۇفتي ەرشات وڭعاروۆ.
ۇلىق مەيرامدا مۇقتاج وتباسىلارعا قالاي كومەكتەسۋگە بولاتىنى دا ءسوز بولدى. ماسەلەن، اۋىزاشارعا كەتەتىن قارجىنى اۋدارۋ ارقىلى قولداۋ كورسەتۋگە بولادى.
– اۋىز بەكىتكەن جاندارعا ازىق-تۇلىك جەتكىزىپ بەرسەڭىز دە، اۋىز اشتىرعاننىڭ ساۋابىن الاسىز. ءتىپتى كومەككە مۇقتاج وتباسىلارعا اۋىز اشارعا كەتەتىن شىعىندى بەرىپ، قارجىلاي قولداۋ كورسەتسەڭىز دە مول ساۋاپقا كەنەلەسىز، – دەدى قمبد ءتوراعاسى، باس ءمۇفتي ناۋرىزباي قاجى تاعان ۇلى.
قازاقستان مۇسىلماندارى ءدىني باسقارماسىنىڭ وكىلدەرى ورازا كەزىندە تۋىس، كورشى-قولاڭعا اۋىزاشارعا بارۋدان باس تارتىپ، وقشاۋلانۋعا شاقىردى. ءبىراز سابىر ەتىپ، قيىندىقتى وتكەرگەن كەزدە ءبىر-بىرىمىزدى قوناققا شاقىرامىز دەدى. ال ورازا تۇتقانداردا كوروناۆيرۋس بەلگىلەرى پايدا بولسا نە ىستەۋ كەرەكتىگى دە ايتىلدى.
– توتەنشە جاعدايدى ەسكەرە كەلە، مۇنداي جاعدايدا ەگەر سەنىمدى دارىگەر بەلگىلى ءبىر اعزانىڭ زاقىمدانۋى، جاڭا اۋرۋدىڭ پايدا بولۋى جانە اۋرۋدىڭ اسقىنۋ ءقاۋپى كۇشەيەتىنىنە، سونداي-اق،بىلىكتى ءارى ادىلەتتى مۇسىلمان دارىگەرىنىڭ كەڭەسىمەن ورازا ۇستاماۋعا رۇقسات ەتىلەدى. كوروناۆيرۋسقا قاتىستى يممۋنيتەتتىڭ السىرەپ، سيمپتومدارى پايدا بوسلا، وندا ورازاسىن توقتاتىپ، باسقا كۇندەرى ورازاسىن، قازاسىن وتەۋىنە رۇقسات ەتىلەدى، – دەدى قمدب ءتوراعاسىنىڭ ورىنباسارى، نايم ءمۇفتي ەرشات وڭعاروۆ.
سونىمەن قاتار اۋىز بەكىتكەندەرگە انتيسەپتيكالىق قۇرالدار مەن سپيرت قولدانۋعا بولاتىنىن اتاپ ءوتتى.
– ولار ورازانى بۇزبايدى. سەبەبى ءقازىر توتەنشە جاعدايدامىز، سوندىقتان ۆيرۋس كەزىندە دەنساۋلىعىنا زيان كەلتىرمەي، قايتا ونى قورعايتىن دۇنيەلەردى قولدانۋ قاجەت، مۇنى شاريعاتىمىز قولدايدى، – دەدى باس ءمۇفتي.
