قۇقىق قورعاۋشىلار ۇلىبريتانيا ۇكىمەتىن قىتايدىڭ شىڭجاڭ پروۆينسياسىنان كەلەتىن ماقتا يمپورتىنا تىيىم سالۋعا شاقىردى. ولاردىڭ ايتۋىنشا، شىڭجاڭدا ۇيعىر، قازاق مۇسىلماندارى ءماجبۇرلى تۇردە جۇمىس ىستەيتىن زاۋىتتار ورنالاسقان. بۇل تۋرالى The Independent جازدى.
سارسەنبىدە HMRC-گە (ۇلىبريتانيا كىرىستەر مەن شىعىستار دەپارتامەنتى) زاڭگەرلەر مەن قۇقىق قورعاۋشىلار دايىنداعان 60 بەتتەن تۇراتىن قۇجات ۇسىنىلدى. اۆتورلار قۇجاتتا "شىڭجاڭداعى ءماجبۇرلى ەڭبەك رەجيمىنىڭ اۋقىمى مەن اۋىرلىعىنا قاتىستى ۇلكەن جانە سەنىمدى دالەلدەر" بار ەكەنىن ايتتى.
وتكەن جىلى H&M، Ikea، Muji جانە Uniqlo سياقتى بريتاندىق تانىمال برەندتەر شىڭجاڭ ماقتاسىن ءوز ونىمدەرىندە پايدالانعان. كەيبىر كومپانيالار مۇنى اشىق ايتقان. Uniqlo ءوزىنىڭ جەيدەلەرىندە قولدانىلاتىن شىڭجاڭ ماقتاسىن "جوعارى ساپاسىمەن تانىمال" دەپ ماقتاعان.
بۇۇ شىڭجاڭدا مۇسىلمان ازشىلىقتارىنا قارسى جۇيەلى تۇردە ادام قۇقىقتارىن بۇزۋشىلىق بولىپ جاتىر دەپ سانايدى. 2017 جىلدان باستاپ قىتايدا ميلليوننان استام ادام قامالدى دەگەن مالىمەت بار. كەيبىر مالىمەتتەر بويىنشا بۇل كورسەتكىش ءۇش ميلليوندى قۇرايدى. الايدا بەيجىڭ بۇلاردى "كاسىپتىك وقۋ ورتالىقتارى" دەپ اتايدى.
جۇڭگو ۇكىمەتى "بۇل ورتالىقتار ەرىكتى جانە بۇل ەلدىڭ سولتۇستىك-باتىسىندا يسلامشىل بۇلىكشىلەردىڭ كۇشىن جويۋ ءۇشىن قاجەتتى قادام" دەپ سەندىرەدى. ءبىراق قۇقىق قورعاۋشىلار "مۇنداي ورتالىقتاردى "وقىپ بىتىرگەندەر" ورتالىق ۇكىمەت سحەماسى بويىنشا زاۋىتتارعا اۋىسادى، جەرگىلىكتى جاتاقحانالاردا تاۋلىك بويعى باقىلاۋدا تۇرادى جانە ءوز ۇيلەرىنە ورالۋعا رۇقسات بەرىلمەيدى" دەيدى.
ماقتا – جۇڭگو ءۇشىن ۇلكەن بيزنەس. ستراتەگيالىق جانە حالىقارالىق زەرتتەۋلەر ورتالىعىنىڭ ەسەبىنە سايكەس، جۇڭگو بۇكىل الەمدىك ماقتا جەتكىزىلىمدەردىڭ 20-25 پايىز مولشەرىن قامتاماسىز ەتەدى. ونىڭ 84 پايىزى شىڭجاڭنان كەلەدى.
پىكىر قالدىرۋ