شىعىس قازاقستان وبلىسىندا اعىمداعى جىلدىڭ 18 ساۋىرىنەن باستاپ كوروناۆيرۋستىق ينفەكسيانىڭ تارالماۋىنىڭ الدىن الۋ جانە اۋىرعان ناۋقاستاردىڭ سانىن ازايتۋ ماقساتىندا توتەنشە جاعداي رەجيمى جاريالاندى.

الايدا، سوعان قاراماستان شەكتەۋ شارالارىن ساقتامايتىن تۇرعىندار دا بار.
اعىمداعى جىلدىڭ 20-22 ءساۋىر ارالىعىندا پوليسيا قىزمەتكەرلەرى رەيد جۇرگىزدى.

ناتيجەسىندە ءتارتىپ ساقشىلارى توتەنشە جاعداي رەجيمىن بۇزعان 102 تۇرعىندى اكىمشىلىك جاۋاپكەرشىلىككە تارتتى. ونىڭ ىشىندە 94ء-ى رۇقساتناما ارقىلى قالا ىشىندە ارى-بەرى قاتىناۋ ەرەجەسىن بۇزعان. ال قالعان 7ء-ى ەپيدەميانىڭ الدىن الۋ جۇمىستارىنىڭ قاعيدالارىن ساقتاماعان. وسىلايشا، ەكى كۇننىڭ ىشىندە 69 ادامعا ەسكەرتۋ جاسالىپ، 19 تۇرعىنعا ايىپپۇل سالىنىپ، 14 ادام قاماۋعا الىندى.

اكىمشىلىك جاۋاپكەرشىلىككە تارتىلعان تۇرعىنداردىڭ ءىسى وسكەمەن قالالىق مامانداندىرىلعان اكىمشىلىك سوتىنا جولداندى.

سوت شەشىمىمەن ت. ەسىمدى ازامات ماس كۇيىندە رۇقساتناماسىز قالا ىشىندە جۇرگەنى ءۇشىن ءۇش كۇنگە قاماۋعا الىندى.

ەسكەرتە كەتەيىك، بۇل ازامات بۇعان دەيىن بىرنەشە مارتە اكىمشىلىك جاۋاپكەرشىلىككە تارتىلعان. الايدا وعان وسى كەلەڭسىز جايتتار «ساباق» بولماسا كەرەك.

سونداي-اق سوت شەشىمىمەن قالا ىشىندە رۇقساتناماسىز جۇرگەنى ب. ەسىمدى ازامات ەكى كۇنگە قاماۋعا الىندى.

سوتتىڭ شەشىمىمەن گ. ەسىمدى ازامات تاق كۇندەرى قالا ىشىندە قاتىناۋ ءۇشىن جاسىل رۇقساتنامانى زاڭسىز پايدالانعانى ءۇشىن 10 اەك (27 780 تەڭگە) كولەمىندە ايىپپۇل تولەدى.