رامازان ايىندا نۇر-سۇلتان قالاسىنىڭ مەشىتتەرىندە كەشكى ناماز جاماعاتسىز وقىلادى. سونداي-اق يمامدار تۇرعىنداردى اۋىزاشارعا قوناق شاقىرۋدان باس تارتۋعا شاقىردى، دەپ حابارلايدى نۇر-سۇلتان قالاسى اكىمدىگىنىڭ رەسمي سايتى.
توتەنشە جاعداي جانە كارانتين رەجيمىنە بايلانىستى رامازان ايى مەرەكەسى كەزىندە قوعامدىق قاۋىپسىزدىكتى قامتاماسىز ەتۋ ماقساتىندا مەشىتتەردە ءداستۇرلى كەشكى تاراۋىق نامازدارى، اۋىزاشارلار ۋاقىتشا توقتاتىلادى.
قازاقستان مۇسىلماندارى ءدىني باسقارماسىنىڭ رەسمي پاراقشالارىندا مەشىت يمامدارىنىڭ قاتىسۋىمەن قۇران وقۋ بويىنشا جانە رامازان ايىنىڭ باسقا دا شارالارىنىڭ ونلاين-ترانسلياسيالارى وتەدى. ءپىتىر ساداقانى Kaspi.kz قوسىمشاسى ارقىلى جولداۋعا بولادى. 2020 جىلى ءپىتىر ساداقانىڭ جان باسىنا شاققانداعى مولشەرى – 370 تەڭگە.
ءپىتىر ساداقانى دۇرىس جولداۋ نۇسقاۋلىعىمەن قازاقستان مۇسىلماندارى ءدىني باسقارماسىنىڭ رەسمي پاراقشاسىندا (muftiyatkz)، نۇر-سۇلتان قالاسىنىڭ ءدىن ماسەلەلەرىن زەرتتەۋ ورتالىعىنىڭ پاراقشاسىندا (elorda_cipr) نەمەسە 33-30-30 سەنىم تەلەفونى ارقىلى تانىسۋعا بولادى. 2020 جىلى رامازان ايى مەرەكەسى 24 ءساۋىر مەن 23 مامىر ارالىعىندا وتەدى.
پىكىر قالدىرۋ