مەملەكەت باسشىسى كوروناۆيرۋس پاندەمياسىنا بايلانىستى جاريالانعان توتەنشە جاعداي كەزىندە ەكى اپتانىڭ ىشىندە سالىنعان ەلورداداعى ءمودۋلدى جۇقپالى اۋرۋلار اۋرۋحاناسىنا باردى.

مەديسينالىق مەكەمەنىڭ جالپى اۋماعى 7 مىڭ شارشى مەتردى قۇرايدى. ونىڭ قۇرىلىسىنا رەسپۋبليكالىق بيۋدجەتتەن 5،5 ميلليارد تەڭگە ءبولىندى. مەديسينالىق نىساندى «BI Group» كومپانيالار توبى سالدى.

اۋرۋحانا عيماراتى تەز قۇراستىرىلاتىن قۇرىلىس تەحنولوگياسىن پايدالانا وتىرىپ، مودۋلدىك بلوكتاردان تۇرعىزىلدى. 200 ورىنعا ەسەپتەلگەن اۋرۋحانا مەديسينا قىزمەتكەرلەرى مەن ەم الۋشىلاردىڭ قاۋىپسىزدىگىن قامتاماسىز ەتەتىن زاماناۋي قۇرالدارمەن جابدىقتالعان.

دەنساۋلىق ساقتاۋ ءمينيسترى ەلجان ءبىرتانوۆ پرەزيدەنتكە ىندەتكە قارسى كۇرەستەگى مەديسينالىق كومەكتىڭ پروبلەمالارى مەن ونى جەتىلدىرۋ جولدارى تۋرالى باياندادى. مەملەكەت باسشىسى ناۋقاستاردى ەمدەۋگە قاجەتتى بارلىق قۇرالدارمەن جابدىقتالعان ەمدەۋ بولىمشەلەرى مەن پالاتالاردى ارالاپ كوردى.

«BI Group» قۇرىلىس حولدينگى ديرەكتورلار كەڭەسىنىڭ ءتوراعاسى ايدىن راحىمبايەۆ قاسىم-جومارت توقايەۆقا قۇرىلىس جۇمىستارىنىڭ بارىسى مەن اۋرۋحانانىڭ ەرەكشەلىكتەرى تۋرالى ايتتى.

مەملەكەت باسشىسى اتالعان اۋرۋحانانىڭ مۇنداي تيپتەگى ەلىمىزدەگى العاشقى مەديسينالىق مەكەمە ەكەنىن اتاپ ءوتىپ، عيماراتتى سالعان قۇرىلىسشىلارعا ريزاشىلىعىن ءبىلدىردى.

قازاقستان پرەزيدەنتى دارىگەرلەرمەن اڭگىمەلەسۋ بارىسىندا وتانداستارىمىزدىڭ دەنساۋلىعىن ساقتاۋ ءۇشىن قاجىرلى ەڭبەك ەتىپ جاتقان مەديسينا قىزمەتكەرلەرىنە العىس ايتتى.

– سىزدەر پاندەميامەن كۇرەستە الدىڭعى شەپتە جۇمىس ىستەپ جۇرسىزدەر. سىزدەرگە ريزاشىلىعىمىز شەكسىز. كۇندىز-تۇنى تىنباي ەڭبەك ەتىپ جاتىرسىزدار. وكىنىشكە قاراي، الماتىدا دارىگەرلەرىمىزدى ىندەتتەن قورعاي المادىق. ءقازىر قالىپتاسقان توتەنشە جاعدايدى جويۋ ءۇشىن كۇرەسۋدەمىز. سوندىقتان اباي بولعاندارىڭىز ءجون، ەڭ الدىمەن، ءوز دەنساۋلىقتارىڭىزدى ساقتاڭىزدار، – دەدى مەملەكەت باسشىسى.

قازاقستان پرەزيدەنتى ازاماتتارىمىزدىڭ دەنساۋلىعىن ساقتاۋ مەملەكەتتىڭ الدىنداعى باستى مىندەت ەكەنىنە توقتالدى. ونىڭ ايتۋىنشا، بۇگىنگى داعدارىستان دەنساۋلىعى مىقتى ۇلت قانا امان-ەسەن شىعادى.

– كەشەندى شارالار قابىلداۋ كەرەك. ءبىز پوستكەڭەستىك كەڭىستىكتە قاجەتتى شارالاردى ەڭ العاشقىلاردىڭ ءبىرى بولىپ قابىلدادىق. ازاماتتارىمىزعا كارانتين رەجيمىن ساقتاۋدىڭ وڭاي ەمەس ەكەنىن تۇسىنەمىن. ءبىراق بۇدان باسقا جول جوق. قالاي بولعاندا دا وسى ايدىڭ اياعىنا دەيىن كارانتين رەجيمىن ساقتايمىز. ارعى جاعىن تاعى دا قاراستىرامىز. مۇمكىن، ماسەلەنى رەتتەۋدىڭ جاڭا ادىستەرى تابىلار. ويتكەنى حالىق بىرتىندەپ ۇيلەرىنەن شىعۋى كەرەك، – دەدى قاسىم-جومارت توقايەۆ.

مەملەكەت باسشىسى ەكونوميكانى قولداۋدىڭ ماڭىزدىلىعى جايىندا دا ايتتى.

– ەكونوميكالىق دامۋ، شاعىن جانە ورتا بيزنەس تۋرالى دا ويلانۋ كەرەك. كۇندەلىكتى ەڭبەك ەتىپ، تىرشىلىگىن جاساپ جاتقان حالىق ءوز مۇمكىندىكتەرىنەن ايىرىلىپ قالماۋى قاجەت. بۇل جونىندە كەلەسى اپتاداعى تەليەۆيزيالىق ۇندەۋىمدە ەگجەي-تەگجەيلى ايتامىن، – دەدى پرەزيدەنت.

قاسىم-جومارت توقايەۆ دارىگەرلەرمەن اڭگىمەلەسۋ كەزىندە سانيتارلىق-ەپيدەميولوگيالىق قىزمەت جۇيەسىن رەفورمالاۋ ماسەلەسىنە توقتالدى.

– ءاربىر داعدارىستىڭ ءوز ساباعى بولادى. ونى ەسكەرۋ كەرەك. ءبىز قازىرگى داعدارىس پەن پاندەميادان ساباق الىپ جاتىرمىز. شىن مانىندە، سوڭعى جىلدارى سانيتارلىق-ەپيدەميولوگيالىق قىزمەت جۇيەسىن دامىتۋعا جانە ونى قولداۋعا ءتيىستى دارەجەدە كوڭىل بولىنبەدى. ارينە، ونىڭ بەلگىلى ءبىر سەبەپتەرى بار. ونى سىزدەر جاقسى بىلەسىزدەر. ءبىز ءقازىر دەنساۋلىق ساقتاۋ مينيسترلىگىنىڭ جۇمىسىن قايتا قالىپتاستىرىپ جاتىرمىز. قاجەتتى رەفورمالار جۇرگىزىلەتىن بولادى. اتاپ ايتقاندا، باس سانيتارلىق دارىگەردىڭ وكىلەتتىگى كۇشەيتىلەدى، – دەدى مەملەكەت باسشىسى.

مەديسينا قىزمەتكەرلەرى قولداۋ كورسەتكەنى ءۇشىن مەملەكەت پەن پرەزيدەنتكە العىس ايتتى. سونداي-اق ولار دارىگەر-ينفەكسيونيستەردىڭ ەڭبەك اقىلارىن ارتتىرۋ ماسەلەسىن كوتەردى.

– ءبىز ءقازىر بيۋدجەتتىڭ بارلىق قاراجاتىن شوعىرلاندىرىپ جاتىرمىز. سىزدەر قازاقستاننىڭ وسىعان دەيىن قالىپتاسقان ءداستۇرلى نارىعىنىڭ قۇلدىراعانىن تۇسىنۋگە تيىسسىزدەر. بيۋدجەتكە تۇسۋگە ءتيىستى قارجىنىڭ نەگىزگى بولىگىن تولىق الا الماي وتىرمىز. دەگەنمەن وسىنداي كۇردەلى قارجىلىق قيىندىقتارعا قاراماستان، سىزدەردىڭ وتىنىشتەرىڭىزدى قاراۋسىز قالدىرمايمىز، – دەدى قاسىم-جومارت توقايەۆ.