دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) مالىمەتى بويىنشا، كوروناۆيرۋسپەن اۋىرعان ادام ۆيرۋستى ەكىنشى رەت تاعى دا جۇقتىرۋى مۇمكىن. بۇل تۋرالى قامشى ءتىلشىسى Bloomberg اقپاراتىنا سىلتەمە جاساپ حابارلايدى. 

بىرىككەن ۇلتتار ۇيىمىنىڭ 24 ساۋىردەگى مالىمدەمەسىندە: «كوۆيد-19-دان ساۋىققان، يممۋنيتەتى قالىپتاسقان ادامداردىڭ ەكىنشى رەت ۆيرۋس جۇقتىرمايتىنى تۋرالى ءقازىر ەشقانداي دالەل جوق»، - دەلىنگەن.

ددسۇ ايتۋىنشا، كەيبىر ەلدەر كوروناۆيرۋسقا قاتىستى جاڭساق شەشىمدەر قابىلداۋدا. بىرنەشە رەسپۋبليكا ۆيرۋسقا قارسى “انتيدەنەلەرى بار ادامدار” ءۇشىن ساپارعا نەمەسە جۇمىسقا ورالۋعا مۇمكىندىك بەرەتىن «يممۋنيتەت پاسپورتى» نەمەسە «ۆيرۋستىڭ قاتەرىنە قارسى سەرتيفيكات» بەرۋدى ۇسىنعان. الايدا، ددسۇ اقپاراتى بويىنشا، مۇنداي سەرتيفيكات العان ادامدار دەنساۋلىق ساقتاۋ نۇسقاۋلارىن ەلەمەي، اۋرۋدىڭ ودان ءارى تارالۋ ءقاۋپىن ارتتىرۋى مۇمكىن.

ءبىر قىزىعى، چيلي ءبىرىنشى بولىپ يممۋنيتەتتىك كارتالاردى شىعاراتىنىن جاريالاپ ۇلگەرگەن. بۇل ماماندار ءۇشىن الاڭداۋشىلىق تۋعىزۋدا، سەبەبى، كەيبىر تەستىلەر سەنىمسىز بولىپ شىقققان، ءتىپتى، "كەيبىرەۋلەر كارتانى الۋ ءۇشىن ادەيى اۋىرىپ قالۋى مۇمكىن" دەيدى ددسۇ. اقش جانە باسقا ەلدەر سوعان قاراماستان، بۇل نۇسقانى قاراستىرىپ جاتقانىن جاريالاعان.