پرەزيدەنت ق.توقايەۆتىڭ مالىمدەمەسى كوروناۆيرۋس ءورشىپ تۇرعان كەزدە حالىققا جۇبانىش بولاتىنداي مالىمدەمە بولدى. بۇل تۋرالى اقىن، جازۋشىلار وداعىنىڭ ءتوراعاسى ۇلىقبەك ەسداۋلەت ايتتى.
– پرەزيدەنت قاسىم-جومارت توقايەۆتىڭ كەشەگى مالىمدەمەسىن تولىقتاي وقىپ شىقتىم. كارانتين ۋاقىتى قاسيەتتى رامازان ايىمەن تۇسپا-تۇس كەلىپ وتىر. رامازان – سابىردىڭ ايى عوي. پرەزيدەنتىمىز ءوز مالىمدەمەسىندە سابىر، شىدامدىلىق، قاناعات، ءتوزىم دەگەن اسىل قاسيەتتەرگە ءمان بەرگەن ەكەن. ونىڭ مالىمدەمەسىندە حالىققا كۇندەلىكتى قاجەتتى كاسىپورىنداردىڭ جۇمىسىن جانداندىرۋ دەگەن سەكىلدى وزەكتى ماسەلەلەر كوتەرىلگەن، – دەيدى اقىن.
دەگەنمەن ۇلىقبەك ەسداۋلەت "كوروناۆيرۋس قازاقستاننىڭ مەديسينا سالاسىنداعى كەمشىلىكتەردى انىق كورسەتتى" دەپ سانايدى.
– كارانتين كەزىندەگى ولقىلىقتار دا جوق ەمەس. كوروناۆيرۋس قازاقستاننىڭ مەديسينا سالاسىنداعى كەمشىلىكتەرىن انىق كورسەتتى. ونىڭ ۇلكەن ءبىر مىسالى ناۋقاستاردى ەمدەيتىن دارىگەرلەردىڭ كوروناۆيرۋس جۇقتىرۋى بولىپ وتىر. بۇل دارىگەرلەردىڭ قاتەلىگى بولدى دەپ ويلامايمىن. ولارعا بەرىلەتىن قورعانىش كيىمدەرىنىڭ جەتىسپەۋشىلىگىنەن بولعان. بۇل مەديسينا سالاسىنداعى ۇلكەن كەمشىلىك بولدى. سونىمەن قوسا ۆيرۋسولوگيا سالاسىنداعى ارنايى دارىگەرلەردىڭ جەتىسپەۋشىلىگى كوزگە انىق كورىندى. ءتىپتى مۇنداي مامانداردى دايىندايتىن فاكۋلتەتتىڭ جابىلىپ قالعان كورىنەدى. سونىڭ زاردابىن ەندى تارتىپ جاتىرمىز. قاراپايىم مەديسينالىق ماسكانىڭ تاپشىلىعى دا ءبىزدىڭ ءونىمدى سىرتتان الۋعا داعدىلانعانىمىزدىڭ ايقىن كورىنىسى بولدى. پرەزيدەنت وسى ماسەلەردىڭ ءبارىن جويۋ تۋرالى ناقتى تاپسىرما بەرگەنى قۋانتتى. ول حالىقتىڭ دەنساۋلىعىن ساقتاۋ جونىندەگى كودەكسكە ەلەۋلى وزگەرىستەر ەنگىزۋ تۋرالى ۇكىمەتكە تاپسىرما بەرگەن. زاڭدىق جاعىنان وزگەرىستەردىڭ ساقتالۋى الداعى ۋاقىتتا قاداعالانادى دەپ ەسەپتەيمىن، – دەدى ۇلىقبەك ەسداۋلەت.
پىكىر قالدىرۋ