ەرجان باباقۇماروۆ ق ر پرەزيدەنتىنىڭ تاپسىرمالارىن ورىنداۋ ماسەلەلەرى بويىنشا زەرتحانا باسشىلارىمەن كەڭەس وتكىزدى. بۇل تۋرالى الماتى قالاسى اكىمدىگىنىڭ باسپا ءسوز قىزمەتى حابارلادى.

قالا اكىمىنىڭ ورىنباسارى ەرجان باباقۇماروۆ قالانىڭ مەملەكەتتىك باس سانيتارلىق دارىگەرى جانداربەك بەكشينمەن ۆيدەو-كونفەرەنسيا بايلانىسى ارقىلى COVID-19-عا زەرتتەۋ جۇرگىزەتىن التى زەرتحانانىڭ باسشىلارىمەن كەزدەسۋ وتكىزدى.

مەملەكەت باسشىسىنىڭ تۇرعىنداردى كوروناۆيرۋستىق ينفەكسياعا تەستىلەۋ كولەمىن ارتتىرۋ جونىندەگى تاپسىرمالارىن ورىنداۋ بارىسى قارالدى. بۇگىندە الماتىدا جۇرگىزىلەتىن زەرتتەۋلەر سانىن كۇنىنە 2،5 مىڭ تەستكە دەيىن جەتكىزۋ مىندەتى تۇر. سونداي-اق زەرتحانالاردىڭ فۋنكسيالارىن شەكتەۋ جانە زەرتتەلەتىن تۇلعالار كونتينگەنتى بويىنشا ءموبيلدى بريگادالاردى ءبولۋ ماسەلەلەرى تالقىلاندى.

COVID-19 دياگنوستيكاسى بويىنشا جۇرگىزىلگەن جۇمىستار تۋرالى الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين باياندادى. بۇگىندە الماتى قالاسىندا پتر ادىسىمەن كوروناۆيرۋستى دياگنوستيكالاۋدى 6 زەرتحانا جۇزەگە اسىرادى: ۇلتتىق ساراپتاما ورتالىعى، سانيتارلىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى، م. ايقىمبايەۆ اتىنداعى اسا ءقاۋىپتى ينفەكسيالار ۇلتتىق عىلىمي ورتالىعى، ورتالىق رەفەرەنس-زەرتحانا، سونداي-اق قازاقستان-كورەي كلينيكاسى مەن «وليمپ» كدز.

الماتىدا پتر ادىسىمەن بارلىعى 42 مىڭنان استام تەست وتكىزىلدى. جۇرگىزىلەتىن زەرتتەۋلەر سانىنىڭ كورسەتكىشى جوسپارلى تۇردە وسكەنى بايقالادى. تەست الۋدىڭ ماكسيمالدى قۋاتتىلىعى كۇنىنە 1900 بولعانىنا قاراماستان، سوڭعى 7 كۇننىڭ ىشىندە قالادا ورتاشا ەسەپپەن 2155 تەست جۇرگىزىلدى. تەست الۋ جۇمىسىنا بارلىعى 300 قىزمەتكەر جۇمىلدىرىلعان. سونىمەن قاتار، زەرتحانالاردا نىساندار مەن اۋرۋ وشاقتارى ايماعىنا بارۋعا ارنالعان ءموبيلدى بريگادالار دا قىزمەت ەتەدى.

الماتى قالاسى اكىمىنىڭ ورىنباسارى ەرجان باباقۇماروۆ تەستىلەردىڭ ۇزدىكسىز الىنىپ، ونىڭ قۋاتتىلىعىن ۇلعايتۋ ءۇشىن زەرتحانالاردى قاجەتتى ماتەريالدارمەن قامتاماسىز ەتۋ ماسەلەسىن كوتەردى.

– تەستىلەۋ كولەمىن ارتتىرۋ جونىندەگى مەملەكەت باسشىسى بۇيرىعىن ورىنداۋ ماقساتىندا ماماندار الەۋەتىن ارتتىرۋ جانە قوسىمشا مەديسينالىق بريگادالار قۇرۋ قاجەت، – دەپ اتاپ ءوتتى ە. باباقۇماروۆ.

الماتى قالاسى بويىنشا تاۋارلار مەن قىزمەتتەردىڭ ساپاسىن باقىلاۋ دەپارتامەنتىنە قالالىق قوعامدىق دەنساۋلىق ساقتاۋ باسقارماسىمەن بىرلەسە وتىرىپ، العاشقى مەديسينالىق-سانيتارلىق كومەك كورسەتۋ ۇيىمدارىنىڭ قىزمەتكەرلەرىن زەرتتەۋ ماتەريالدارىن الۋ ادىستەمەلەرىن وقىتۋ جوسپارىن جاساۋ تاپسىرىلدى.