داريعا نازاربايەۆانىڭ توراعالىعىمەن وتكەن سەناتتىڭ كەزەكتى وتىرىسىندا ءبىرقاتار زاڭ جوبالارى قابىلداندى، دەپ حابارلايدى سەناتتىڭ باسپا ءسوز قىزمەتى.
ورتالىق سايلاۋ كوميسسياسىنىڭ مۇشەسى لاۋازىمىنا تاعايىنداۋ – كۇن ءتارتىبىنىڭ ءبىرىنشى ماسەلەسى بولدى. جوعارعى پالاتا باسشىسىنىڭ ۇسىنىسى بويىنشا سەرىك سىدىقوۆ قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى بولىپ بەكىتىلدى.
سونداي-اق سەناتورلار قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭ جوباسىن، سونداي-اق زاڭناماعا بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى جونىندەگى تۇزەتۋلەردى ءبىرىنشى وقىلىمدا ماقۇلدادى. بۇل قۇجاتتاردىڭ نەگىزگى ماقساتى ازاماتتاردىڭ بەيبىت جانە قارۋسىز جينالۋعا، جينالىستار، ميتينگىلەر مەن دەمونستراسيالار، شەرۋلەر مەن پيكەتتەر وتكىزۋگە كونستيتۋسيالىق قۇقىعىن جۇزەگە اسىرۋ.
سەنات قابىلداعان زاڭدار قاتارىندا "قازاقستان رەسپۋبليكاسىنىڭ كوشi-قون پروسەستەرiن رەتتەۋ ماسەلەلەرi بويىنشا كەيبiر زاڭنامالىق اكتiلەرiنە وزگەرiستەر مەن تولىقتىرۋلار ەنگiزۋ تۋرالى" زاڭ بار. سەنات ونى ەكى وقىلىمدا قابىلدادى.
زاڭناماعا سايكەس، ەتنيكالىق قازاقتار "ورالمان" مارتەبەسىن الۋ ءۇشىن قازاقستان رەسپۋبليكاسىنىڭ تاۋەلسىزدىك العانعا دەيىن شەت مەملەكەتتىڭ اۋماعىندا تۇرۋ فاكتىسىن راستاۋ قاجەت. ءىس جۇزىندە، 1991 جىلدان كەيىن تۋعان ەتنيكالىق قازاقتار مۇنداي قۇجاتتاردى بەرە المايدى. وسىعان بايلانىستى، "ورالمان" مارتەبەسىن الۋ ءۇشىن بۇرىن قازاقستان رەسپۋبليكاسىنىڭ ازاماتتىعىندا بولماۋى نەگىزگى كريتەرييى رەتىندە ەنگىزىلەدى.
سونىمەن قاتار، "ورالمان" ءسوزىن "قانداس" سوزىنە اۋىستىرۋ بولىگىندە تۇزەتۋلەر ەنگىزىلدى.
پىكىر قالدىرۋ