كسرو مەملەكەتتىك سىيلىعىنىڭ لاۋرەاتى، ءداۋىردىڭ دارا ۇستازى اتانعان قانيپا بىتىبايەۆانىڭ 75 جىلدىعىنا وراي «ۇستازدارعا ۇستاز بولعان – اسىل جان» اتتى اپتالىق قاشىقتىقتان ۇيىمداستىرىلدى. اپتالىقتىڭ وتۋىنە شىعىس قازاقستان وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا قولداۋ كورسەتتى.

جەتى كۇنگە جوسپارلانعان ءىس شارادا اباي مەن مۇحتاردى دارىپتەگەن ۇلاعاتتى ۇستاز جايلى بەينەروليكتەر كورسەتىلدى. سونداي-اق رەسپۋبليكالىق قازاق ءتىلى مەن ادەبيەتىنەن وتكىزىلەتىن پاندىك وليمپيادانىڭ ءانۇرانىنا اينالعان «سارقىلمايتىن ساعىنىشىم – حان اپا» اتتى ءان ناقىشىنا كەلتىرە ورىندالدى.

اپتالىق بارىسىندا كوزى تىرىسىندە-اق اتى اڭىزعا اينالعان قانيپا بىتىبايەۆانىڭ ارىپتەستەرى مەن شاكىرتتەرى رەسپۋبليكانىڭ تۇكپىر-تۇكپىرىنەن جۇرەكجاردى لەبىزدەرىن بەينەروليك ارقىلى جولدادى. سونىڭ ىشىندە ۇلاعاتتى ۇستازدىڭ اتىنا تۇڭعىش رەت وقۋ گرانتىن بولگەن س.امانجولوۆ اتىنداعى شقمۋ-دىڭ رەكتورى مۇحتار تولەگەننىڭ قازاقتىڭ حان اپاسىنا ارناعان جىلى لەبىزى قاتىسۋشىلاردىڭ جۇرەگىن ەلجىرەتتى. بۇدان سوڭ شىعىس قازاقستان گۋمانيتارلىق كوللەدجىنىڭ ديرەكتورى فارحاد قۇرمانوۆ ءسوز الىپ، كورنەكتى ۇستاز تۋرالى وي-تولعامىن جەتكىزدى.

– ۇلاعاتتى ۇستازىم، قانيپا ومارعالي قىزى مەنىڭ ادام رەتىندە قالىپتاسۋىما جانە عىلىم جولىنا بەت بۇرۋىما ۇلكەن ەڭبەك ءسىڭىردى. مەنىڭ ەكىنشى انامداي بولدى. سوناۋ 1987 جىلدان ماعان قازاق ءتىلى مەن ادەبيەتى پانىنەن ساباق بەردى. سوندا حان اپامىز بىزگە «كىم بولامىن؟» دەگەن تاقىرىپتا شىعارما جازدىردى. ول كەزدە ءبارىمىز باسقا ماماندىق يەسى بولامىز دەپ ويىمىزدى بىلدىردىك. الايدا ۋاقىت وتە كەلە قانيپا بىتىبايەۆا ءبىزدى ادەبيەت نارىمەن سۋسىنداتتى. ءبىز ونىڭ ساباقتارىنا اسقان قىزىعۋشىلىقپەن دايىندالدىق. 11 سىنىپتى بىتىرگەندە 25 وقۋشىنىڭ 20-سى قازاق ءتىلى مەن ادەبيەتى ءپانى ءمۇعالىمى ماماندىعىنا وقۋعا ءتۇستى. مەن قانيپا اپايدىڭ اۆتورلىق سىنىبىنىڭ العاشقى تۇلەگىمىن. ۇستازىم مەنىڭ ۋنيۆەرسيتەت قابىرعاسىنداعى العاشقى عىلىمي جەتەكشىم بولدى. اباي مەن مۇحتاردى زەرتتەۋگە باعىت-باعدار بەردى. ۇستاز بەينەسى ءبىزدىڭ ماڭگى جۇرەگىمىزدە ساقتالادى، – دەدى س.امانجولوۆ اتىنداعى شقمۋ-دىڭ پروفەسسورى، ابايتانۋشى ايجان كارتايەۆا.

اپتالىق كەزىندە جامبىل اتىنداعى مامانداندىرىلعان مەكتەپ-گيمنازيا-ينتەرناتىنىڭ 7-11 سىنىپتار اراسىنداعى تاربيە جەتەكشىلەرىنىڭ باستاۋىمەن قانيپا ومارعاليقىزىنا ارنالعان چەللەندج ۇيىمداستىرىلدى. وعان گۇلنار وماربايەۆا، قارلىعاش ساعيدوللدينا، بايان قىرىقبايەۆا، ءجاميلا احمەتوۆا، كەنجەگۇل ەلەۋسىزوۆا، ينديرا ءالىمحان قىزى، ءانيا رايسوۆا سىندى ءبىرقاتار قىزمەتكەرلەر قاتىستى.

بيىلعى جىلدىڭ ەرەكشەلىگى سول، ۇلى اقىن اباي قۇنانباي ۇلىنىڭ 175 جىلدىق مەرەيتويى مەن كسرو مەملەكەتتىك سىيلىعىنىڭ لاۋرەاتى قانيپا ومارعالي قىزىنىڭ 75 جىلدىعى تۇسپا-تۇس كەلىپ وتىر. اپاي ۇستازدىقتى ۇلىقتاعان ەرەكشە تۇلعا ەدى. ونىڭ بۇل سالاداعى سىڭىرگەن ەڭبەگى زور، - دەدى پ.ع.دوكتورى، پروفەسسورى فاۋزيا ورالبايەۆا.

اپتالىق بارىسىندا «ماقتانساڭ، قانيپام دەپ قازاق ماقتان» اتاۋىمەن قانيپا بىتىبايەۆانىڭ رەسپۋبليكالىق عىلىمي-ادىستەمەلىك زەرتحاناسىنىڭ جۇمىسى ۇستازدار قاۋىمىنىڭ نازارىنا ونلاين رەيمدە ۇسىنىلدى. وسى ماقساتتا 60-قا تارتا بەينەروليك ءتۇسىرىلدى.

– قانيپا بىتىبايەۆا ەسىمى التىن ارىپتەرمەن جازىلاتىن ۇلى تۇلعا. مەن ءۇشىن تەك قانا قازاق ءتىلى مەن ادەبيەتىنىڭ ءمۇعالىمى عانا ەمەس، جالپى قازاق ۇستازىنىڭ سيمۆولى، ەتالونى دەر ەدىم. ونىڭ ءبىر اۋىز ءسوزى مەنىڭ وعان دەگەن قۇرمەتىمدى ارتتىردى. حان اپا ايتۋشى ەدى: «ەگەر ماعان حان تاعىن ۇسىنسا، مەن وعان ەشقاشاندا ۇستازدىق جولىمدى ايىرباستاماس ەدىم» دەپ. وسى ارقىلى ول ءبىزدىڭ بويىمىزعا ادالدىقتى ءسىڭىردى، – دەدى حالىقارالىق ۇلتتىق يۋنەسكو كلۋبتارى فەدەراسياسى كلۋبىنىڭ ۆيسە-پرەزيدەنتى ع.بەيسەنبايەۆ.