الماتى قالاسى «الەۋمەتتىك مەديسينالىق ساقتاندىرۋ قورى» كەاق فيليالىنىڭ ديرەكتورى نۇرلىبەك قابدىقاپاروۆ ق ر پرەزيدەنتىنىڭ تاپسىرماسىن ورىنداۋ اياسىندا 1 ساۋىردەن باستاپ 1 شىلدەگە دەيىن ساقتاندىرىلماعان ازاماتتاردىڭ ءمامس جۇيەسىنە مەديسينالىق كومەك الۋ قۇقىعىن ۇزارتۋ تۋرالى ايتىپ بەردى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

– ءساۋىر ايىنان باستاپ ەلىمىزدە مىندەتتى الەۋمەتتىك مەديسينالىق ساقتاندىرۋ جۇيەسى تولىققاندى ىسكە قوسىلۋى ءتيىس بولاتىن. ءبىراق مەملەكەت باسشىسىنىڭ كوروناۆيرۋس ىندەتىنە بايلانىستى بەرگەن تاپسىرماسىنا سايكەس، بۇل مەرزىمدى 1-شىلدەگە اۋىستىرۋ تۋرالى شەشىم قابىلداندى. ياعني، وسى ۋاقىتقا دەيىن قازاقستاننىڭ بارلىق تۇرعىندارى «شارتتى» تۇردە ساقتاندىرىلعان بولىپ سانالادى. بۇل ەلدە تۇراتىن ءاربىر ازاماتتىڭ تەگىن مەديسينالىق كومەك تۇرلەرىن عانا ەمەس، مەديسينالىق ساقتاندىرۋ پاكەتىندەگى قىزمەتتەردى دە پايدالانۋىنا مۇمكىندىك بەرەدى. جالپى العاندا، بۇل مۇمكىندىكتى 2،5 ميلليوننان استام ادام پايدالانا الادى، – دەدى نۇرلىبەك قابدىقاپاروۆ.

ول سونداي-اق، قور ءوزىنىڭ ىشكى رەزەرۆىنەن 20 ملرد تەڭگەدەن استام قارجى ءبولۋدى جوسپارلاپ وتىر. ول ساقتاندىرىلماعان ازاماتتاردىڭ كومپيۋتەرلىك توموگرافيا، ماگنيتتى-رەزونانستىق توموگرافيا، پسر سىندى قىمبات اناليزدەرگە دەگەن سۇرانىسىن قاناعاتتاندىرۋعا جۇمسالماق.

– ءقازىر ەلىمىزدە بارلىعى 16،4 ميلليونعا جۋىق ادام ساقتاندىرىلعان بولىپ سانالادى. ونىڭ 11 ميلليونعا جۋىعى – الەۋمەتتىك جاعىنان از قامتىلعان ساناتتار. بىلايشا ايتقاندا، حالىقتىڭ جارتىسىنان كوبى بيۋدجەت ەسەبىنەن ساقتاندىرىلىپ وتىر، – دەدى.

سپيكەردىڭ ايتۋىنشا، مەديسينالىق ساقتاندىرۋ قورى حالىققا كورسەتىلگەن مەديسينالىق قىزمەتتەر اقىسىن تولەيتىن قارجى وپەراتورى ەكەنىن، 2020 جىلى رەسپۋبليكا بويىنشا 1 250-دەن استام مەديسينا ۇيىمىمەن كەلىسىمشارت بەكىتىلگەن، ونىڭ 600-دەن استامى – جەكەمەنشىك. جەتكىزۋشىلەرمەن بەكىتىلگەن كەلىسىمشارتتىڭ جالپى سوماسى 1،3 ترلن تەڭگە. ال، الماتى قالاسى بويىنشا بيىل 182،2 ملرد تەڭگەنىڭ قىزمەتىن ساتىپ الۋ كوزدەلگەن. ونىڭ: 110،7 ملرد تەڭگەسى – تەگىن مەديسينالىق كومەك پاكەتىنە، 71،4 ملرد تەڭگەسى – ساقتاندىرۋ پاكەتىنە تيەسىلى.

– ەستەرىڭىزگە سالا كەتسەم، قازاقستاندا مىندەتتى الەۋمەتتىك مەديسينالىق ساقتاندىرۋ جۇيەسى 2020 جىلدىڭ باسىندا ەنگىزىلدى. اۋەلدە جىلدىڭ باستاپقى ءۇش ايى وتپەلى كەزەڭ رەتىندە جاريالاندى. سەبەبى، جاڭا جۇيە بولعاندىقتان ءارتۇرلى سۇراقتاردىڭ تۋىندايتىنى راس. وتپەلى كەزەڭ وسىنداي ماسەلەلەردى شەشىپ، تۇرعىنداردىڭ جاڭا جۇيەنى باعالاپ، ونىڭ ارتىقشىلىقتارىن سەزىنۋى ءۇشىن ەنگىزىلگەن بولاتىن. دەگەنمەن، بۇل قازاقستان ازاماتتارى مەن وسىندا تۇراقتى تۇراتىن شەتەلدىكتەردى جارنا تولەۋ مىندەتىنەن بوساتپايدى. شىلدەنىڭ بىرىنە دەيىن ساقتاندىرىلماعان تۇرعىندار ءمامس پاكەتىندەگى قىزمەتتەردى پايدالانا المايدى.

ءبىراق بۇل ساقتاندىرۋ جۇيەسىنە ەنبەگەن ازاماتتار مەديسينالىق كومەكتەن قاعىلادى دەگەندى بىلدىرمەيدى. بىزدە مەملەكەت تاراپىنان كەپىلدىك بەرىلگەن تەگىن مەديسينالىق كومەك بار جانە ول بارلىق ازاماتتارعا كورسەتىلەدى. ياعني، شۇعىل جاعدايلاردا كەز-كەلگەن ادامعا كەز-كەلگەن جەردە كومەك بەرىلۋى ءتيىس. مىسالى، ولار بۇرىنعىشا جەدەل جاردەم شاقىرتا الادى، سوزىلمالى، ءقاۋىپتى جانە الەۋمەتتىك ماڭىزى بار اۋرۋلار تەگىن ەمدەلەدى، دارى-دارمەكپەن قامتاماسىز ەتىلەدى، – دەدى فيليال ديرەكتورى.

سپيكەردىڭ ايتۋىنشا جالپى، قازىرگى تاڭدا قورعا قارجى جيناقتاۋ جالعاسىپ جاتىر. ساقتاندىرۋ جۇيەسى ىسكە قوسىلعان 2017 جىلدىڭ 1-شىلدەسىنەن 2020 جىلدىڭ 31-ناۋرىزىنا دەيىنگى ارالىقتا مەديسينالىق ساقتاندىرۋ قورىنا 298،1 ملرد تەڭگەدەن استام قارجى جيناقتالعان.

– الماتى قالاسى جارنا تولەۋ جاعىنان كوش باستاپ تۇر – جيناقتالعان سومانىڭ بەستەن ءبىر بولىگى بۇرىنعىشا، وڭتۇستىك استانالىقتارعا تيەسىلى. اتاپ ايتقاندا، الماتىلىقتاردىڭ قورعا اۋدارعان جارناسى 60 ملرد. تەڭگەدەن اسىپ جىعىلدى. ونىڭ 54،7 ملرد تەڭگەسى – جۇمىس بەرۋشىلەرگە تيەسىلى. سونداي-اق، جىل باسىنان بەرى ءوزىن-وزى جۇمىسپەن قامتىعان 10 مىڭعا جۋىق الماتىلىق تۇرعىن 40،1 ملن تەڭگە كولەمىندە ءبىرىڭعاي جيىنتىق تولەم تولەگەن، – دەدى ن. قابدىقاپاروۆ.