الماتىدا 10 مىڭنان استام ادام COVID-19 ىندەتىنە تەكسەرىلدى. بۇل تۋرالى  قالالىق تاۋارلار مەن قىزمەتتەر ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا مالىمدەدى.

– مەگاپوليستە 10 مىڭنان استام ادام ءقاۋىپتى ىندەتكە تەكسەرىلدى. سونىڭ ىشىندە 93 جاعداي راستالدى، – دەپ اتاپ ءوتتى سپيكەر.

اۋىرعانداردىڭ باسىم بولىگى مىنا رەيستەرمەن ۇشىپ كەلگەن. اتاپ ايتقاندا، ماسكەۋ — 33%، ىستامبۇل — 25%، بەرلين — 16%، سانكت-پەتەربۋرگ —13%، مينسك — 13%.

– جاس شاماسىنا قاراي الاتىن بولساق، ىندەت جۇقتىرعانداردىڭ كوبى 20-29 جاستاعىلار. ەكىنشى ورىندا 30-39 جاس جانە ءۇشىنشى، ءتورتىنشى ورىندا 40-49 جاس جانە تيىسىنشە 50-59 جاس تا بار. 60 جاستان اسقان، ياعني وسال توپتاعىلاردىڭ اراسىندا 7 جاعداي تىركەلدى، – دەدى ا. مولداعاسىموۆا.

بريفينگتى قورىتىندىلاعان قالانىڭ باس سانيتارلىق دارىگەرى مەگاپوليستە تەستىلەر، رەاگەنتتەر، بارلىق قاجەتتى اپپاراتتار مەن تەكسەرۋ جۇرگىزەتىن قۇرالدار جەتكىلىكتى مولشەردە ەكەنىن ايتتى.