كوروناۆيرۋسكە بايلانىستى كارانتين كەزىندە قالا تۇرعىندارىنىڭ اراسىندا جۇمىسپەن قامتۋ ماسەلەسى شيەلەنىسە ءتۇستى. بۇل تۋرالى الماتى قالاسىنىڭ اكىمى باقىتجان ساعىنتايەۆ instagram جاريالادى.
– كوپتەگەن ادامدار اقىسىز دەمالىسقا شىعۋعا ءماجبۇر بولسا، ەندى بىرەۋلەر جۇمىسىنان ايىرىلدى. دەمەك، ءومىر سۇرەتىن قاراجاتىنسىز قالدى. مەملەكەت تاراپىنان ولارعا كومەك رەتىندە جاردەماقى تولەنەدى. بۇعان قوسا ءبىز «جۇمىسپەن قامتۋدىڭ جول كارتاسى» باعدارلاماسىن ىسكە قوسپاقپىز، – دەدى ب. ساعىنتايەۆ.
سونىمەن قاتار قالا تۇرعىندارى جۇمىسپەن قامتىلادى جانە ولار مەكتەپ پەن بالاباقشالاردىڭ قۇرىلىسىنا، اۋرۋحانانى كەڭەيتۋ جۇمىستارىنا تارتىلادى دەپ اتاپ ءوتتى.
– بۇدان وزگە سۋمەن جابدىقتاۋ جەلىلەرىن جۇرگىزىپ، جولدار مەن اۋلالاردى رەتكە كەلتىرۋ، سكۆەرلەر مەن ساياباقتاردى اباتتاندىرۋعا قوسىمشا كۇش قاجەت. وسىلايشا 214 ينفراقۇرىلىمدىق جوبالارداعى جۇمىسقا شامامەن 26 مىڭ قالا تۇرعىنىن ورنالاستىرۋدى جوسپارلاپ وتىرمىز. جالاقىنىڭ ورتاشا مولشەرى 120 مىڭ تگ قۇرايدى، – دەدى شاھار باسشىسى.
پىكىر قالدىرۋ