الماتى قالاسىندا جاڭادان جۇقتىرعان 8​ جاعداي انىقتالدى. بۇل تۋرالى اكىمدىكتىڭ باسپا ءسوز قىزمەتى مالىمدەدى.

التى ناۋقاس قالالىق بالالار جۇقپالى اۋرۋلار اۋرۋحاناسىنىڭ، بىرەۋى ورتالىق قالالىق كلينيكالىق اۋرۋحانانىڭ قىزمەتكەرلەرى. سونداي-اق بىرەۋى پروۆيزورلىق ستاسيوناردا كارانتيندە ەمدەلىپ جاتقان، بۇعان دەيىن ۆيرۋس جۇقتىرعان ناۋقاسپەن بايلانىستا بولعان ناۋقاس بار.

جالپى ينفەكسيالىق ستاسيونارلاردا الماتى وبلىسىنان ءبىر ايەل ادامدى ەسەپكە العاندا كوروناۆيرۋستىق ينفەكسيادان 427 ادام ەمدەلۋدە.

ءۇش ەمدەلۋشىنىڭ جاي-كۇيى – وتە اۋىر، 6-ۋى – اۋىر، 121 ادامدا اۋىرلىقتىڭ ورتاشا دارەجەسى، قالعاندارىنىڭ دەنساۋلىعى قاناعاتتانارلىق جاعدايدا. ءقاۋىپتى ىندەتتەن 84 ناۋقاس ەمدەلىپ شىقتى.

پروۆيزورلىق گوسپيتالداردا​ 278 ادام، كارانتيندىك وقشاۋلاۋدا​ – 431، ءۇي كارانتينىندە​ 9687 ادام بار.