الماتىدا ورازا كەزىندە اۋىزاشار ءۇشىن مۇقتاج جاندار مەن كوپبالالى وتباسىلارعا تاماقتى ۇيلەرىنە جەتكىزىپ بەرۋگە بولادى. بۇل تۋرالى قالا اكىمدىگىنىڭ باسپا ءسوز قىزمەتى مالىمدەدى.

رامازان ايىندا ورازا تۇتقان باۋىرلارىمىز ءوز ۇيىندە اۋىز اشقانى دۇرىس. ال مۇقتاج جاندار مەن كوپبالالى وتباسىلارعا اۋىز اشتىرعىسى كەلەتىن ازاماتتار بولسا، ولاردىڭ بۇل ساۋاپتى ءىسى دە تەك كارانتين تالاپتارىنا ساي جۇرگىزىلەدى. الماتى قالاسىنىڭ باس يمامى ەركىنبەك شوقاي ونلاين رەجيمدە وتكەن بريفينگتە وسىلاي مالىمدەدى.

كارانتينگە بايلانىستى ەلىمىزدە ۋاقىتشا جيىن-تويلار وتكىزۋگە، اس بەرۋگە، ادامداردىڭ شوعىرلانۋىنا، ءتىپتى، مەشىتتەردە جاماعات بولىپ قۇلشىلىق ەتۋگە ۋاقىتشا تىيىم سالىندى. ارينە، بۇل ازاماتتارىمىزدىڭ دەنساۋلىعىن ساقتاۋ مەن جۇقپالى ىندەتتى اۋىزدىقتاۋ ءۇشىن جاسالعان شەشىم.

– باس ءمۇفتي ناۋرىزباي قاجى تاعان ۇلى جۇقپالى ىندەتتىڭ تارالۋىنىڭ الدىن الۋ ماقساتىندا تاراۋىق نامازى مەشىتتەردە جاماعاتپەن وقىلمايتىنىن جانە مەشىتتەردە، ءدامحانالاردا، قوعامدىق ورىنداردا، ت.ب. مەكەمەلەردە جينالىپ اۋىزاشار بەرۋگە ۋاقىتشا بولمايتىنىن جەتكىزدى. سوندىقتان قاسيەتتى رامازان ايىندا ورازا تۇتقان باۋىرلارىمىز ءوز ۇيىندە اۋىز اشقانى دۇرىس، – دەدى ە. شوقاي.

ەگەر بۇعان دەيىنگى رامازان ايلارىندا اۋىزاشاردى جىل سايىن مەشىتتەردىڭ جانىندا، مەيرامحانالار مەن ۇيگە قوناق شاقىرىپ ۇيىمداستىرعان بولساق، بيىلعى ورازادا بۇل ىستەرگە رۇقسات جوق.

اۋىزاشاردى تەك ۇيدە عانا وتكىزىپ، تاراۋىق نامازى دا ۇيدە وقىلادى. ال مۇقتاج جاندار مەن كوپبالالى وتباسىلارعا اۋىز اشتىرعىسى كەلەتىن ازاماتتار بولسا، ولاردىڭ بۇل ساۋاپتى ءىسى دە تەك كارانتين تالاپتارىنا ساي جۇرگىزىلمەكشى.

– اللا ەلشىسى «كىمدە كىم ورازا ۇستاعان كىسىگە اۋىز اشتىرار بولسا، ورازا ۇستاعانداي ساۋاپ الادى. ءبىراق ورازا ۇستاعاننىڭ ساۋابى كەمىمەيدى» دەگەن. وسى ءداستۇردى ءبىز وسى كارانتينگە دەيىن جىل سايىن مەشىتتەردىڭ جانىندا، مەيرامحانالار مەن ۇيدە ۇيىمداستىراتىنبىز. ءبىراق بيىلعى جىلعى كارانتيندىك تالاپتار بۇلاردىڭ بىرەۋىنە دە مۇمكىندىك بەرمەي وتىر. الايدا ساۋاپتان قۇر قالعىسى كەلمەگەن قايىرىمدى جاندار بىزدە وتە كوپ. سولاردىڭ نيەتىن ءبىز كارانتيندىك تالاپتىڭ شەڭبەرىندە جاسايمىز. ياعني ارنايى مەيرامحانالارعا تاپسىرىس بەرۋ ارقىلى مۇقتاج جاندار مەن كوپبالالى وتباسىلاردىڭ ۇيلەرىنە تاماق جەتكىزىپ بەرۋ قىزمەتىنە جۇگىنە وتىرىپ، ۇيىمداستىرساق دەگەن نيەتىمىز بار. ارينە، مۇنىڭ ءبارى سول ازاماتتاردىڭ مۇمكىندىگىنە قاراي ۇيىمداستىرىلادى، – دەدى ەركىنبەك شوقاي.

ەسكەرتە كەتەيىك، بيىل 19 مامىردان 20 مامىرعا قاراعان ءتۇن – قاسيەتتى ءقادىر ءتۇنى.