4 مامىردا "جۋرناليستيكا جانە قوعامدىق ديپلوماتيا: ولار بىر-بىرىنە قالاي قولداۋ كورسەتە الادى؟" تاقىرىبىندا ونلاين كەزدەسۋ ءوتتى. قازاقستانداعى اقش ەلشىلىگىنىڭ قولداۋىمەن ۇيىمداستىرىلعان ۆەبينارعا قازاقستاندىق ستۋدەنتتەر مەن جۋرناليستەر قاتىستى.

كەزدەسۋدە اقش-تىڭ قازاقستانداعى ەلشىسى ۋيليام موزەر جۋرناليستەردى وتكەن دۇنيەجۇزىلىك باسپا ءسوز بوستاندىعى كۇنىمەن قۇتتىقتاپ، باق-تىڭ قازىرگى الەمدەگى ءرولى تۋرالى ويىمەن ءبولىستى.

جىل سايىن 3 مامىردا الەم دۇنيەجۇزىلىك باسپا ءسوز بوستاندىعى كۇنىن اتاپ وتەدى. ونىڭ ماقساتى – باسپا ءسوز بوستاندىعىنىڭ نەگىزىن قالاۋشى قاعيداتتاردى ەسكە الۋ، ب ا ق تاۋەلسىزدىگىنە قولسۇعۋشىلىقتان قورعاۋعا جاردەمدەسۋ، الەمدەگى باسپا ءسوز بوستاندىعىنىڭ جاعدايىن باعالاۋ.

ونلاين كەزدەسۋدىڭ سپيكەرلەرى – ەلشىلىكتىڭ باسپا ءسوز حاتشىسى شون بودا جانە ب ا ق ماسەلەلەرى جونىندەگى كەڭەسشى قارلىعاش جامانقۇلوۆا بولدى.

ۆەبينار اياسىندا شون بودا جۋرناليست تاۋەلسىزدىگىنە نۇقسان كەلتىرىپ الماي، باسپا ءسوز قىزمەتى وكىلدەرىمەن قالاي بايلانىس ورناتۋ كەرەگىن، سونداي-اق، اقش ەلشىلىگىندەگى جۋرناليستەردى قولداۋ شارالارى تۋرالى ايتىپ بەردى.

"قازاقستانداعى اقش ەلشىلىگى جۋرناليستەردى جان-جاقتى قولداۋعا تىرىسادى. مەنىڭ ويىمشا، قوعامدى دامىتۋعا كومەكتەسەتىن ورتاق قۇندىلىقتاردى ءبولىسۋ اسا ماڭىزدى"، – دەدى شون بودا.

ايتا كەتەيىك، كەزدەسۋدى قازاقستانداعى اقش ەلشىلىگىنىڭ قولداۋىمەن حالىقارالىق اقپاراتتىق تەحنولوگيالار ۋنيۆەرسيتەتىنىڭ مەدياكوممۋنيكاسيا كافەدراسى ۇيىمداستىردى.