«قازاقستاندىقتار – كەڭەس وداعىنىڭ باتىرلارى» دەرەكتى بەينەانتولوگياسى كورسەتىلەدى. بۇل تۋرالى Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى پاراقشاسىندا ايتتى.

«قۇرمەتتى دوستار! سىزدەردى جەڭىستىڭ 75 جىلدىعى قارساڭىندا «استانا» تەلەارناسىندا «قازاقستاندىقتار – كەڭەس وداعىنىڭ باتىرلارى» دەرەكتى بەينەانتولوگياسى كورسەتىلە باستايتىنى تۋرالى حاباردار ەتپەكپىن.

ۇلى وتان سوعىسىنا قازاقستاننىڭ 1 ميلليون ەكى ءجۇز مىڭنان استام ۇل-قىزى قاتىستى. ءاربىر ەكىنشى وتانداسىمىز مايداننان ورالمادى. 530 قازاقستاندىق كەڭەس وداعىنىڭ باتىرى اتاعىنا يە بولدى. تاۋەلسىزدىك العاننان كەيىن ەلباسىنىڭ جارلىعىمەن ۇلى وتان سوعىسىنىڭ تاعى 9 قاتىسۋشىسىنا «حالىق قاھارمانى» اتاعى بەرىلدى.

داڭقتى قاھارماندارىمىزدىڭ ەرلىك تاريحى تاڭبالانعان 70 دەرەكتى فيلمنەن تۇراتىن بۇل كينوتۋىندىلار جەلىسى نۇرسۇلتان ءابىش ۇلى نازاربايەۆتىڭ تاپسىرماسىمەن 2015 جىلى ءتۇسىرىلدى. بۇل ءۇشىن «ارداگەرلەردى ارداقتايىق» پارتيالىق جوباسىنىڭ اياسىندا اۋقىمدى ارحيۆ ماتەريالدارى جيناقتالدى. سونىمەن بىرگە مۇندا مايداننان جازىلعان حاتتار مەن جەكە جازبالار دا قامتىلدى.

الداعى مەرەكەلىك دەمالىس كۇندەرىن ەسكەرسەك، قازاقستاندىقتارعا باۋىرجان مومىش ۇلى، راقىمجان قوشقاربايەۆ، تالعات بيگەلدينوۆ، لەونيد بەدا، ءاليا مولداعۇلوۆا، سەرگەي لۋگانسكيي، مانشۇك مامەتوۆا، ساعادات نۇرماعامبەتوۆ، نۇركەن ءابدىروۆ سىندى اتى اڭىزعا اينالعان قاھارماندارىمىز بەن باسقا دا باتىرلارىمىزدىڭ ەرلىكتەرى، ولاردىڭ سوعىستان كەيىنگى ومىرلەرى تۋرالى تاعى دا ءبىر ەسكە ءتۇسىرۋدىڭ كەرەمەت مۇمكىندىگى ۇسىنىلىپ وتىر.

وكىنىشكە قاراي، جىل وتكەن سايىن سۇراپىل سوعىستا قان توككەن، مايداننىڭ بار قاجەتىن قامتاماسىز ەتۋ ءۇشىن تىلدا جان اياماي ەڭبەك ەتكەن ارداگەرلەرىمىزدىڭ قاتارى سيرەپ بارادى.

ەل تاۋەلسىزدىگىنىڭ تۇعىرىن نىعايتۋ بارىسىنداعى بارشا قيىندىقتارعا قاراماستان، ەلباسىنىڭ سىندارلى ساياساتىنىڭ ارقاسىندا تۇراقتىلىق، بەيبىتشىلىك پەن كەلىسىم ساقتالدى. سوندىقتان ءبىز، اسىرەسە جاس بۋىن، بۇگىنگى بەيبىت تە ەركىن ءومىرىمىز ءۇشىن باستارىن بايگەگە تىگىپ، سول جولدا جانقيارلىقپەن شايقاسقان قازاقستاندىق قاھارماندارىمىزدىڭ ۇلى ەرلىكتەرىن ەشقاشان ۇمىتپاۋىمىز كەرەك.

اعا بۋىننىڭ ەرلىگى مەن نامىسى، ەرجۇرەكتىگى مەن ادالدىعى، دوستىعى مەن وتانشىلدىعى بۇگىنگى جانە بولاشاق وتان قورعاۋشىلارىمىزعا ۇلگى بولۋعا ءتيىس.

بارشاڭىزدى الداعى وتان قورعاۋشىلار كۇنىمەن جانە ۇلى وتان سوعىسىنداعى جەڭىستىڭ 75 جىلدىعىمەن قۇتتىقتايمىن»، - دەپ جازدى باۋىرجان بايبەك.

ايتا كەتەيىك، اتالعان فيلمدەردى «استانا» تەلەارناسىنىڭ ەفيرىنەن بولەك، YouTube-ارناسى مەن @Astana.TV الەۋمەتتىك جەلىلەرىنەن دە تاماشالاۋعا بولادى.