تۇركىستان وبلىسىنىڭ ەلدى مەكەندەرىن سۋ باسۋعا قاتىستى وزبەك تاراپىنا ق ر سىرتقى ىستەر مينيسترلىگى نارازىلىق نوتاسىن جىبەرمەيدى. بۇل تۋرالى ق ر ءسىم-نىڭ رەسمي وكىلى ايبەك سمادياروۆ ايتتى.
«وزبەكستان رەسپۋبليكاسى اۋماعىنداعى ساردوبا سۋ قويماسى بوگەتىنىڭ بۇزىلۋى جانە ونىڭ سالدارىنان تۇركىستان وبلىسىنىڭ ءبىرقاتار ەلدى مەكەندەرىن سۋ باسۋ بويىنشا جاعداي ءبىزدىڭ ۇكىمەتتىڭ ەرەكشە باقىلاۋىندا. 2 مامىردا قازاقستان پرەزيدەنتى قاسىم-جومارت توقايەۆ وزبەكستان پرەزيدەنتى شاۆكات ميرزيويەۆپەن تەلەفون ارقىلى سويلەسكەنى جانە سۇحبات بارىسىندا تاراپتار ورىن العان جاعدايدى ناقتى تالقىلاپ، ەكى ەل ۇكىمەتى ۇيلەسىمدى جۇمىس اتقاراتىنى تۋرالى ۋاعدالاسقانى ءمالىم. سۋ باسۋ سالدارىن بىرلەسىپ جويۋ بويىنشا ۇكىمەت پەن شەكارالاس وڭىرلەر باسشىلارىنىڭ تىعىز ءوزارا ءىس-قيمىلىن نازارعا الا وتىرىپ، وزبەك تاراپىنا ق ر سىرتقى ىستەر مينيسترلىگىنىڭ نوتاسىن جولداۋ ماسەلەسى قاراستىرىلمايدى»، - دەدى ايبەك سمادياروۆ.
رەسمي وكىلدىڭ ايتۋىنشا، تۇركىستان وبلىسىنىڭ اكىمى ءومىرزاق شوكەيەۆ وزبەكستاننىڭ كورشىلەس وڭىرلەرىنە جەدەل تۇردە ساپار جاساعان. وزبەك تاراپىمەن قاجەتتى كەلىسسوزدەر جۇرگىزىپ، ونىڭ قورىتىندىلارى تۋرالى ۇكىمەتتىڭ بۇگىنگى وتىرىسىندا باياندادى.
«وزدەرىڭىزگە ءمالىم، پرەمەر-مينيستردىڭ ورىنباسارى رومان سكليار باستاعان ۇكىمەتتىك كوميسسيا قۇرىلدى. ەرتەڭ ول تۇركىستان وبلىسى مەن وزبەكستانعا بىرلەسكەن ءىس-قيمىل الگوريتمىن پىسىقتاۋ ءۇشىن بارادى. ەكى تاراپتىڭ بارلىق بايلانىستارى تولىقتاي ماڭگىلىك دوستىق جانە ستراتەگيالىق ارىپتەستىك تۋرالى شارتتاردىڭ جانە ترانسشەكارالىق سۋ اعىندارى مەن حالىقارالىق كولدەردى قورعاۋ جانە پايدالانۋ جونىندەگى كونۆەنسيانىڭ نورمالارىنا سايكەس جۇزەگە اسىرىلادى»، - دەدى ءسىم وكىلى.
پىكىر قالدىرۋ