ايتىسكەر اقىن رينات زايىتوۆ ءىnstagram پاراقشاسىندا تۇركىستان وبلىسى ماقتاارال اۋدانىنداعى ەلدى مەكەندەردى سۋ باسۋى باسشىلىقتىڭ نەمقۇرايلىلىعىنىڭ سالدارى ەكەنىن ايتتى.
"كوكتەم كەلە سالىسىمەن جىلدا حالقىمىز جادىراپ، جايناپ كۇلۋدىڭ ورنىنا سۋ استىندا قالىپ، زار جىلاپ، شاراسىز شۋلايتىنى ءبىزدىڭ ەلدە ادەتتى جاعدايعا اينالىپ بارا جاتقانداي. جىلدا قازاقستاننىڭ ايتەۋىر بىر-ەكى ءوڭىرى سۋعا باتادى دا جاتادى. حالىق اقشا جينايدى، ءبىز جۇباتۋ ءسوزىن ايتىپ، سابىرعا شاقىرامىز. جىل سايىن وسى. نەگە؟ سەبەبى بىرەۋ، باسشىلىققا ءبارىبىر. مىنە وسى ارسىزداردىڭ نەمقۇرايلىلىعىنىڭ زاردابىن جازىقسىز حالىق تارتادى دا جاتادى.
ايتپەسە، سول ماقتارالدىڭ حالقىن الدىن الا نەگە ەسكەرتىپ، نەگە كوشىرۋگە جاردەم بەرمەدى؟ اتتەڭ... تىستەنىپ وتىرىپ جازۋ جازۋدان، بەلسەندى توپقا ازعانتاي تيىن اۋدارۋدان باسقا قولىمىزدان تۇك كەلمەيدى... ەي، ارسىزدار ويلانساڭدارشى.
جىلدا سۋدا قالىپ جاتىرمىز عوي. قاشان ارەكەت جاسايسىڭدار؟ كەلەسى قاي وبلىس؟
ەڭ بولماسا سونى ەرتەرەك ەسكەرتىپ ايتىڭدار.
"عاجاپپىز"- دەپ جىلدا ايتقانمەن اتامىز:
ءبىر اپاتقا جىلدا ۇشىراپ جاتامىز.
قىس كەلگەندە جىلۋ تاپپاي ۇيلەرگە،
كوكتەم كەلسە توپان سۋعا باتامىز.
جەمىرلەرگە باستى ۋايىم ءوز باسى،
بەلگىلى عوي حالىققا قول سوزباسى.
ەي اكىمدەر، بۇل جاي عانا سۋ ەمەس،
بۇل جازىقسىز حالقىمىزدىڭ كوز جاسى!"، – دەپ جازدى اقىن.
پىكىر قالدىرۋ