الماتىدا ۇلى جەڭىستىڭ 75 جىلدىعىنا وراي ىسكە قوسىلعان ەسكە الۋ جانە العىس ايتۋ اكسياسى الەۋمەتتىك جەلىلەردە قارقىن الدى. بۇل تۋرالى almaty.tv حابارلايدى.

«كانيكۋلى Off-Line 2» فيلمىندە ويناعان قازاقستاندىق جاس اكتەر ايبار تاڭعىت ءوزىنىڭ Instagram پاراقشاسىندا #ۇلىدالاباتىرلارى چەللەندجىن ىسكە قوستى.

جاس اكتەر ءوزىنىڭ اتاسى 391ء-شى اتقىشتار ديۆيزياسى ءارى 1024ء-شى اتقىشتار پولكىنىڭ جاۋىنگەرى قازكەن تىشتىقبايەۆتىڭ اسكەري ەرلىكتەرى تۋرالى ايتىپ بەردى.

بۇل چەللەندج تەك ۇلى جەڭىستى عانا ەمەس، بولاشاق ۇرپاقتىڭ بەيبىت ءومىرى ءۇشىن جانىن قيعان باتىرلارىمىزدى دا ۇمىتپاۋعا ۇندەيدى.

«اتالعان اكسياعا ءبىرقاتار قازاقستاندىق تانىمال ادامدار قولداۋ ءبىلدىردى. ولاردىڭ اراسىندا ءانشى، قازاقستاننىڭ ەڭبەك سىڭىرگەن قايراتكەرى ءمادينا ءسادۋاقاسوۆا، اكتەر، رەجيسسەر جانە پروديۋسەر سانجار مادييەۆ، بيزنەسمەن بەيبىت الىبەكوۆ، سپورتشى الديار الىبەكوۆ، ءانشى الىشەر كاريموۆ، اكتريسا دينا تاسبولاتوۆا، ارتيست ءارى سيقىرشى مۇرات مۇتىرعانوۆ، اكتريسا بيبىگۇل اقتان، اكتەر ەرمەك تۇرعانبەك، «BestBrothers» مۋزىكالىق توبى، سونداي-اق جاس جۇلدىزدار: اكتەر بەكەت مۇكەنيەۆ، يلليۋستراتور حانيفا ماعجان، اكتريسا، جۋرناليست ءارى بلوگەر ارۋجان حافيز، مودەل كريستينا كيريچەنكو، اكتەر ايبات ولجاتاي جانە تاعى باسقالار بار»، دەلىنگەن حابارلامادا.

جوبا قاتىسۋشىلارى سونداي-اق، حالىق جادىنداعى باتىرلاردىڭ ەرلىكتەرىن ماڭگى ەستە قالدىرۋ ءۇشىن ءبارىمىزدى وسى قاتارعا قوسىلۋعا شاقىردى. سوعىس قاھارماندارى ءبىز ءۇشىن وتانشىلدىق پەن ادالدىقتىڭ، ادامگەرشىلىك پەن ابىرويدىڭ بيىك ۇلگىسى. وسىناۋ رۋحاني قۇندىلىقتاردى ساقتاۋ جانە ارداگەرلەرىمىزدى مەيىرىم مەن قامقورلىققا بولەۋ اسا ماڭىزدى.