كارانتيننەن شىققاننان كەيىن الداعى بىرنەشە ايدا جانە جىلدىڭ اياعىنا دەيىن حالىقتى جۇمىسپەن قامتۋ قالاي ىسكە اسىرىلاتىنىن پرەمەر-مينيستردىڭ ءبىرىنشى ورىنباسارى ەرالى توعجانوۆ ۇكىمەتتىڭ باسپا ءسوز قىزمەتىندە وتكەن برفينگتە ايتتى.
– بۇل سۇراققا بۇگىن قاسىم-جومارت توقايەۆ ەرەكشە توقتالىپ كەتتى. بۇگىندە قابىلدانعان ناقتى شارالاردىڭ ارقاسىندا 1 ملن-نان اسا ازاماتتاردىڭ جۇمىسقا كىرىسكەندىگى تۋرالى ايتتىق. ءبىراق ءارى قاراي دا بۇل جۇمىستى ءبىز جالعاستىرۋىمىز كەرەك. نەگىزگى ماسەلە – جىلدىڭ اياعىنا دەيىن ازاماتتاردى جۇمىسپەن قامتۋ كەرەك. مۇنداي جوسپار بۇگىن جاسالىندى. بىرنەشە ۇلكەن مەملەكەتتىك پروگراممالار قابىلداندى. وسى مەملەكەتتىك پروگراممالاردىڭ ارقاسىندا 360 مىڭ ورىنعا شەيىن ناقتى شارالار بەلگىلەنىپ وتىر. سونىمەن قاتار ارنايى "ەڭبەك" دەگەن پروگرامما بار. سول پروگرامما بويىنشا جىلدىڭ اياعىنا دەيىن 600-مىڭ ادام جۇمىسپەن قامتىلاتىن بولادى، – دەدى ەرالى توعجانوۆ.
سونىمەن قاتار پرەمەر-مينيستردىڭ ءبىرىنشى ورىنباسارى بۇگىندە ناقتى قابىلدانعان، جۇزەگە اسىرىلعان ۇلكەن شارالاردىڭ ءبىرى "جۇمىسپەن قامتۋ جول كارتاسى" ەكەنىن اتاپ ءوتتى.
– بۇگىن اتالعان باعىتتا 6500-دەن اسا ناقتى جوبالاردىڭ ءتىزىمى ايماقتارمەن بىرگە قارالىپ بەكىتىلدى. جىلدىڭ اياعىنا شەيىن 255-مىڭ ادام جۇمىسقا تۇرعىزىلادى دەپ ەسەپتەپ وتىرمىز. بەكىتكەنىمىزگە ءبىر جۇماداي ۋاقىت بولدى. بۇگىنگى كۇننىڭ وزىندە 18 مىڭعا جۋىق ازاماتتاردىڭ ءوزى وسى ناقتى باعدارلاما ارقىلى جۇمىسقا كىرىسىپ كەتتى. بۇلاردىڭ بارلىعى قاداعالاۋدا. پاندەميانىڭ كەزىندە جاستاردى جۇمىسپەن قامتۋ ماسەلەسى كۇن تارتىبىندە تۇر. سوندىقتان مۇنىڭ ءبارى "جۇمىسپەن قامتۋ جول كارتاسى" اينالاسىندا جۇزەگە اسىرىلاتىن بولادى، – دەپ اتاپ ءوتتى پرەمەر-مينيستردىڭ ءبىرىنشى ورىنباسارى.
پىكىر قالدىرۋ