مەملەكەت باسشىسى قاسىم-جومارت توقايەۆ الماتىعا جۇمىس ساپارى بارىسىندا ۇكىمەتكە بەرگەن جەكە تابىس سالىعىنىڭ ۇدەمەلى ولشەمىن ەنگىزۋ تۋرالى تاپسىرماسىنىڭ ءمانىن ءتۇسىندىردى. بۇل تۋرالى پرەزيدەنتتىڭ باسپا ءسوز قىزمەتىنىڭ جەتەكشىسى بەرىك ءۋالي مالىمدەدى.

– قازاقستان پرەزيدەنتىنىڭ پىكىرىنشە، بۇل جاڭالىقتىڭ ماقساتى الەۋمەتتىك ادىلدىكتى قامتاماسىز ەتۋ. مۇنداي جۇيە ءبىرقاتار مەملەكەتتە قولدانىلادى.

قاسىم-جومارت توقايەۆ ايىنا 250-300 مىڭ تەڭگە جالاقى الاتىن ازاماتتار تابىس سالىعىن 7 پايىزدىق مولشەرلەمە بويىنشا تولەۋگە ءتيىس دەپ سانايدى. ياعني، قازىرگى 10 پايىزدىق مولشەرلەمەدەن تومەن بولادى. ال، ايىنا 300 مىڭ تەڭگەدەن 1،5-2 ميلليون تەڭگەگە دەيىن تابىس تاباتىندار ءۇشىن قازىرگى 10 پايىزدىق مولشەرلەمە ساقتالادى.

پرەزيدەنت جىلىنا 25 ميلليون تەڭگەدەن كوپ تابىس تاباتىن ازاماتتار ءۇشىن پايىزدىق مولشەرلەمە كولەمى ارتۋى ءتيىس دەگەن پىكىردە. مولشەرلەمە كولەمىن ۇكىمەتتىڭ كوميسسياسى انىقتايدى. بۇل رەتتە مەملەكەت باسشىسى جەكە تابىس سالىعىنىڭ پايىزدىق مولشەرلەمەسىنىڭ جوعارعى شەكتى دەڭگەيى 15 پايىزدان اسپاۋى كەرەك دەپ ەسەپتەيدى، – دەدى بەرىك ءۋالي.