«قازمۇنايگاز» ۇلتتىق كومپانياسى» اق ادامي رەسۋرستاردى باسقارۋ جونىندەگى اتقارۋشى ديرەكتورى داۋلەتجان حاسانوۆ وكق-دا وتكەن باسپا ءسوز ءماسليحاتىندا كومپانيادا داعدارىسقا قارسى ستراتەگيا جاسالىپ جاتقانىن مالىمدەپ، قارجىلىق ماسەلەلەرگە بايلانىستى قىزمەتكەرلەرىنىڭ جالاقىسى قىسقارادى دەپ اتاپ ايتتى.

– بۇعان دەيىن «قازمۇنايگاز» ۇلتتىق كومپانياسىنىڭ ورتالىق اپپاراتىندا جۇمىس ىستەيتىن قىزمەتكەرلەردىڭ سانىنىڭ ازاياتىنى تۋرالى حابارلاعان بولاتىنبىز. كوروناۆيرۋستىق پاندەمياعا بايلانىستى مۇناي ونىمدەرىنە سۇرانىستىڭ تومەندەۋى كومپانيانىڭ قارجىلىق جاعدايىنا كەرى اسەر ەتىپ وتىر. بۇعان دەيىن حابارلاعانىمىزداي ءبىرىنشى توقساندا ءبىزدىڭ كومپانيانىڭ تابىسى، وتكەن جىلدىڭ وسىنداي كەزەڭىمەن سالىستىرعاندا 3 ەسەگە قىسقاردى. الەمدىك نارىقتا مۇناي باعاسىنىڭ كۇرت قۇلدىراۋى سالدارىنان كەيبىر ءبىزدىڭ ەنشىلەس كاسىپورىندارىندا قارجى تاپشىلىعى بايقالىپ وتىر، – دەدى داۋلەتجان حاسانوۆ.

وسىعان بايلانىستى «قازمۇنايگاز» كومپانياسىندا داعدارىسقا قارسى ستراتەگيا جاسالىپ جاتىر، بۇل ستراتەگيا كومپانياداعى شىعىنداردى ازايتۋعا جانە داعدارىستان كەيىنگى كەزەڭدە مەكەمەنىڭ تەز ءارى ءتيىمدى دامۋىنا مۇمكىندىك بەرەدى» دەپ اتاپ ءوتتى.

– وسى شارالاردىڭ اياسىندا ديرەكتورلار كەڭەسىنىڭ شەشىمى نەگىزىندە كومپانيانىڭ جاڭا قۇرىلىمى بەكىتىلدى. وسىعان سايكەس ورتالىق اپپاراتتىق شتاتتىڭ سانى 34 پايىزعا، ياعني 729-دان 480-گە دەيىن قىسقاردى. سونىمەن قاتار ورتالىق اپپاراتتاعى دەپارتامەنتتەردىڭ سانى 3 ەسە قىسقاردى. باسقارۋشى ديرەكتورلار لاۋازىمى جويىلدى. وسىلايشا «قازمۇنايگاز»  ۇلتتىق كومپانياسىنىڭ ورتالىق اپپاراتى نارىقتا بولىپ جاتقان وزگەرىستەرگە تەز ءارى ءتيىمدى جاۋاپ بەرە الاتىنداي جيناقى بولىپ، قايتا قۇرىلادى، – دەدى د. حاسانوۆ.

سونداي-اق ول «قازمۇنايگاز» كومپانياسىنىڭ باسقارما شەشىمىمەن ورتالىق اپپاراتتا جالاقى تولەۋدىڭ جاڭا جۇيەسى بەكىتىلگەنىن اتاپ ءوتتى.

– ول جۇيە بويىنشا «قازمۇنايگاز» باسشىلىق قۇرامىنىڭ جالاقىسى 30 پايىزعا ازايادى. ال باسشىلىق قىزمەتتەر سانىنىڭ قىسقارۋىنا بايلانىستى تومەنگى لاۋازىمعا تاعايىندالاتىن ورتا بۋىندى مەنەدجەرلەردىڭ جالاقىلارى 20 پايىزعا دەيىن تومەندەيتىن بولادى. باسقا قاتارداعى قىزمەتكەرلەردىڭ جالاقىسى بۇرىنعى دەڭگەيدە ساقتالادى. كومپانيانىڭ قارجىلىق جاعدايىنا بايلانىستى ءبىز سىياقىدان باس تارتتىق. ەندى جىلدىڭ سوڭىنا دەيىن ەشقانداي سىياقى نەمەسە بونۋستار تولەنبەيدى. مۇناي نارىعىندا قالىپتاسقان جاعداي قانشالىقتى قيىن بولسا دا ءبىز ءاربىر قىزمەتكەردىڭ، ولاردىڭ وتباسىلارىنىڭ الدىنداعى الەۋمەتتىك جاۋاپكەرشىلىگىن تولىق سەزىنەمىز. سوندىقتان «سامۇرىق-قازىنا» قورىنىڭ تاپسىرماسى بويىنشا الەۋمەتتىك جاۋاپكەرشىلىكتى بوساتۋ باعدارلاماسىن ازىرلەدىك. وسى باعدارلاماعا سايكەس ءبىز بوساتىلعان  قىزمەتكەرلەرگە بارىنشا قولداۋ كورسەتەمىز، – دەپ ايتتى بريفينگتە.