ق ر پرەمەر-مينيسترى اسقار مامين قارجى مينيسترلىگىنىڭ ۇجىمىنا جاڭا مينيستر ەرۇلان جاماۋبايەۆتى تانىستىردى. 

ۇكىمەت باسشىسى قارجى مينيسترلىگىنىڭ الدىنا ەلدەگى قارجىلىق تۇراقتىلىقتى قامتاماسىز ەتۋ، بيۋدجەت شىعىندارىن وڭتايلاندىرۋ، بيۋدجەتتىڭ اتقارىلۋى، كەدەندىك جانە سالىقتىق اكىمشىلىكتىڭ تيىمدىلىگىن ارتتىرۋ بويىنشا ماڭىزى ۇلكەن مىندەتتەر قويىلىپ وتىرعانىن اتاپ ءوتتى. 

ا. مامين ە. جاماۋبايەۆتىڭ قارجى-بانك سالاسىنداعى زور ەڭبەك تاجىريبەسى جاڭا مينيسترگە قويىلعان مىندەتتەردى تابىستى شەشۋگە مۇمكىندىك بەرەدى دەگەن سەنىم ءبىلدىردى.

ەرۇلان جاماۋبايەۆ 1974 جىلى 25 ناۋرىزدا الماتى وبلىسىندا تۋعان.

ءبىلىمى جوعارى، 1995 جىلى قازاق مەملەكەتتىك باسقارۋ اكادەمياسىن، «قارجى جانە كرەديت»، 2009 جىلى قازاق ەكونوميكالىق ۋنيۆەرسيتەتىن بىتىرگەن، «ىسكەرلىك اكىمشىلەندىرۋ ماگيسترى».

ەڭبەك جولى:

1996-1998 جىلدارى – قازاق مەملەكەتتىك باسقارۋ اكادەمياسىنىڭ وقىتۋشىسى.

1998-2006 جىلدارى – قازاقستان رەسپۋبليكاسى ۇلتتىق بانكى زەرتتەۋلەر جانە ستاتيستيكا دەپارتامەنتى جەتەكشى ساراپشىسى، باس ساراپشىسى، باس مامان-ساراپشىسى، باسقارما باستىعى، ديرەكتور ورىنباسارى؛

2006-2014 جىلدارى – قازاقستان رەسپۋبليكاسى ۇلتتىق بانكىنىڭ ۇيلەستىرۋ دەپارتامەنتىنىڭ ديرەكتورى.

2014-2015 جىلدارى – «قازاقستاننىڭ تۇرعىن ءۇي قۇرىلىس بانكى» اق-نىڭ باسقارۋشى ديرەكتورى.

2015 جىلعى شىلدە مەن قاراشا ارالىعىندا – قازاقستان رەسپۋبليكاسىنىڭ پرەزيدەنتى اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمى مەڭگەرۋشىسىنىڭ ورىنباسارى.

2015 جىلعى قاراشا مەن 2018 جىلعى قاراشا ارالىعىندا – قازاقستان رەسپۋبليكاسىنىڭ پرەزيدەنتى اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمىنىڭ مەڭگەرۋشىسى.

2018 جىلعى قاراشا مەن 2019 جىلعى ناۋرىز ارالىعىندا قازاقستان رەسپۋبليكاسى پرەزيدەنتىنىڭ كومەكشىسى.

قازاقستان رەسپۋبليكاسى پرەزيدەنتىنىڭ 2019 جىلعى 22 ناۋرىزداعى № 7 وكىمىمەن قازاقستان رەسپۋبليكاسى قارجى مينيسترلىگىنىڭ جاۋاپتى حاتشىسى بولىپ تاعايىندالعان.

كەشە ەكس-قارجى ءمينيسترى ءاليحان سمايىلوۆ ق ر پرەمەر-مينيسترىنىڭ ءبىرىنشى ورىنباسارى بولىپ تاعايىندالعان.