الماتىدا «جۇمىلا كوتەرگەن جۇك جەڭىل» اتتى اكسيا ءوتتى، دەپ حابارلادى ttjk.info سايتى.

وتكەن اپتادا كارانتينگە بايلانىستى ءوز وتاندارىنا قايتا الماعان قىرعىزستان، تاجىكستان جانە وزبەكستان ەلدەرىنىڭ ازاماتتارىنا ازىق-تۇلىك جانە گيگيەنا قۇرالدارى تاپسىرىلدى. 82 قىرعىزستان ازاماتىنا، 120 تاجىكستان ازاماتىنا جانە 10 وزبەكستان ازاماتىنا كومەك كورستەلدى. ولاردىڭ ىشىندە ەڭبەك ميگرانتتارى، ستۋدەنتتەر جانە بالالار دا بار.

ءىس-شارانى «Qolda» شۇعىل كومەك جوباسى اياسىندا «شيەۆرون» كومپانياسىمەن سەرىكتەستىكتە «رودنيك» قوعامدىق قورى جانە ەۋرازيا ورتالىق ازيا قورى ۇيىمداستىردى.

سونىمەن قاتار، الماتىداعى وزبەكستان رەسپۋبليكاسىنىڭ باس كونسۋلدىعى، قىرعىزستان رەسپۋبليكاسىنىڭ باس كونسۋلدىعى، «سومونيەن» تاجىك مادەني-قوعامدىق بىرلەستىكتەرى قاۋىمداستىعى» جانە الماتىداعى «زامانداش» قاۋىمداستىعى دا شاراعا جۇمىلا كىرىستى.

«سومونيەن» ۇيىمىنىڭ ۆيسە-پرەزيدەنتى ۆالييەۆ ينوياتۋللوحون: «بۇل گۋمانيتارلىق كومەك وزگە ەلدە جۇمىسسىز قالعان ءبىزدىڭ وتانداستارىمىزعا ءسال دە بولسىن جاردەم بولدى. جۇمىلا كوتەرگەن جۇك جەڭىل دەمەكشى، بۇل ەل باسىنا تۇسكەن قيىن كەزدە ءبىزدى بىرىكتىردى»،- دەپ ۇيىمداستىرۋشىلارعا العىس ءبىلدىردى.

«رودنيك» قوعامدىق قورىنىڭ ديرەكتورى نينا بالابايەۆا: «جوبا اياسىندا بارلىق سەرىكتەستەردىڭ قوسقان ۇلەستەرى زور. كارانتين باستالعالى بەرى وزبەكستان، قىرعىزستان ەلدەرىنىڭ باس كونسۋلدىقتارى، ۇلتتىق-مادەني ورتالىقتار ميگرانتتارمەن بايلانىستى ۇزگەن جوق. ءبىز ەڭ الدىمەن راسىمەن دە كومەككە مۇقتاج ادامداردىڭ ءتىزىمىن جاسادىق. جوبا بارىسىناعى دىتتەگەن مىندەتتى ورىندادىق، 100 ميگرانتقا كومەك كورسەتىلدى. ولار جىلى پىكىرى مەن العىسىن ايتىپ جاتىر»، دەگەن پىكىرىمەن ءبولىستى.

ەستەرىڭىزگە سالا كەتەيىك، اتالعان اكسيا ورتالىق ازيانىڭ ەۋرازيا قورى «شيەۆرون» كومپانياسىمەن بىرگە كارانتيننىڭ حالىققا تيگىزەتىن كەرى اسەرىن تومەندەتۋ، قوعامدىق جانە ەرىكتىلەر ۇيىمدارىن قولداۋ، ب ا ق ارقىلى حالىقتى اقپاراتتاندىرۋ ماقساتىندا وتكىزگەن «Qolda» جەدەل كومەك كورسەتۋ جوباسى اياسىندا ءوتتى.

واەق – ورتالىق ازيانىڭ ەۋرازيا قورى (واەق) – 2005 جىلى ايماقتا قۇرىلعان ۇكىمەتتىك ەمەس ۇيىم. واەق جەرگىلىكتى قاۋىمداستىقتاردى نىعايتۋ مەن ازاماتتىق جانە ەكونوميكالىق ءال-اۋقاتىن جاقسارتۋ ارقىلى، ازاماتتتاردىڭ ءوز بولاشاعىن قۇرۋدا بەلسەندى قاتىسۋعا كومەكتەسۋ ءۇشىن قوعامدىق جانە جەكە رەسۋرستاردى جۇمىلدىرادى.

كورپوراسيا «شيەۆرون» بۇل الەمدەگى ەڭ ءىرى ينتەگراسيالانعان ەنەرگەتيكالىق كومپانيالاردىڭ ءبىرى، 100-دەن استام ەلدە ءوز جۇمىسىن اتقارادى جانە مۇناي-گاز سالاسىنىڭ بارلىق سالاسىندا جۇمىس ىستەيدى. سونىمەن قاتار، كومپانيا جاڭارتىلاتىن ەنەرگيا مەن الدىڭعى قاتارلى تەحنولوگيالاردى دامىتۋعا ينۆەستيسيا جاسايدى.

«شيەۆرون» قازاقستانداعى جەتەكشى جەكە مۇناي كومپانياسى بولىپ تابىلادى جانە ەلدىڭ ەڭ ءىرى ەكى كەن ورنى – تەڭىز جانە قاراشىعاناقتا ماڭىزدى ۇلەستەرگە يە. كورپوراسيا كاسپيي قۇبىر كونسورسيۋمىنداعى ەڭ ءىرى جەكە اكسيونەرى.