الماتى قالاسى اكىمىنىڭ ورىنباسارى ەرجان باباقۇماروۆ مەگاپوليستىڭ مەملەكەتتىك باس سانيتار دارىگەرى جانداربەك بەكشين جانە قالالىق ءبىلىم باسقارماسىنىڭ باسشىسى ءلاززات جىلقىبايەۆامەن بىرلەسىپ شاھارداعى بارلىق جالپى ءبىلىم بەرەتىن مەكتەپتىڭ ديرەكتورلارىمەن كەزدەسۋ وتكىزدى. وعان 205 مەملەكەتتىك، 61 جەكەمەنشىك مەكتەپتىڭ ديرەكتورى قاتىستى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

كەزدەسۋدىڭ باستى ماقساتى – وقۋ جىلىن قورىتىندىلاۋ دايىندىعىن، مەكتەپ تۇلەكتەرىن قورىتىندى اتتەستاتتاۋدان وتكىزۋدەگى سانيتارلىق-ەپيدەميولوگيالىق جانە ءبىرىڭعاي ۇلتتىق تەستىلەۋدى وتكىزۋدەگى تالاپتاردى، جاڭا وقۋ جىلىندا 1-سىنىپقا قابىلداۋ دايىندىعىن تالقىلاۋ.

بۇگىنگى كۇنى الماتىدا 261 مىڭ وقۋشى بار. اعىمداعى جىلى قالادا 9299 تۇلەك اتتەستات الادى، ولاردىڭ ىشىندە 8667ء-سى مەملەكەتتىك مەكتەپتەردىڭ تۇلەكتەرى بولسا، 632ء-سى جەكەمەنشىك مەكتەپتەردى بىتىرۋشىلەر.

قالالىق ءبىلىم باسقارماسىنىڭ اقپاراتىنا سايكەس:

• ءبىلىم بەرۋ ۇيىمدارىندا وقۋ جىلى 25 مامىردا اياقتالادى.
• 9-11 سىنىپ وقۋشىلارى ءۇشىن قورىتىندى اتتەستاتتاۋ وتكىزىلمەيدى.
• نەگىزگى ورتا جانە جالپى ورتا ءبىلىم بەرەتىن مەكتەپتى بىتىرگەنى جونىندەگى اتتەستاتتاۋ اعىمداعى باعالاردىڭ نەگىزىندە جۇزەگە اسىرىلادى.
• ورتا ءبىلىم بەرۋ ۇيىمدارىنىڭ باسشىلارىنا ەلەكتروندى جۋرنالدارداعى باعالاردى تۇزەۋگە ۇزىلدى-كەسىلدى تىيىم سالىنادى.
• 1-10 سىنىپ وقۋشىلارى ءۇشىن سالتاناتتى لينەيكالار قاشىقتان وتكىزىلەدى.
• 11-سىنىپ بىتىرگەن تۇلەكتەرگە اتتەستات تابىستاۋ شارالارى 3-4 ماۋسىم كۇندەرى كەستەگە سايكەس بارلىق سانيتارلىق-ەپيدەميولوگيالىق تالاپتاردى قاتاڭ ساقتاۋ ارقىلى وتەدى.

سالتاناتتى لينەيكالاردى وتكىزۋدە، ەلدەگى جانە قالاداعى ەپيدەميولوگيالىق جاعدايدى ەسكەرە وتىرىپ، تومەندەگىدەي سانيتارلىق-ەپيدەميولوگيالىق تالاپتار بەلگىلەنگەن:

• لينەيكالاردى تەك ءبىتىرۋشى سىنىپتار ءۇشىن وتكىزۋ جانە وقۋشىلاردىڭ اراسىنداعى الەۋمەتتىك قاشىقتىق كەمىندە 2 م كەم بولماۋى ءتيىس.
• اتتەستتاردى تەك سىنىپتار بويىنشا تابىستاۋ، بۇل شاراعا وقۋشىلاردى، ولاردىڭ اتا-انالارى مەن پەداگوگيكالىق ۇجىم وكىلدەرىن قوسقاندا شامامەن 60 ادامعا عانا قاتىسۋعا رۇقسات ەتىلەدى.
• ءبىر سىنىپتىڭ تۇلەكتەرى مەن ەكىنشى سىنىپتىڭ تۇلەكتەرىنە اتتەستات تابىستاۋ شارالارىنىڭ ارالىعى كەمىندە 1 ساعاتتى قۇراۋى كەرەك.
• تۇلەكتەردىڭ وتباسىلارىنا لينەيكاعا تەك 1-2 اتا-انا عانا كەلۋىنە كەڭەس بەرۋ.
• تۇلەكتەردىڭ وتباسىلارىنا ولاردىڭ ەگدە جاستاعى اتالارى مەن اجەلەرىنە لينەيكاعا كەلۋدەن باس تارتقانى ابزال ەكەنىن ايتۋ.
• مەكتەپتەردىڭ اكىمشىلىكتەرى اتا-انالار كوميتەتتەرىمەن، سىنىپتارمەن جانە پەداگوگيكالىق ۇجىمدارمەن ءتۇسىندىرۋ جۇمىستارىن جۇرگىزۋ.
• ۇبت بارلىق سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ، ادەتتەگى ءداستۇرلى فورماتتا وتەتىن بولادى.

ۇبت وتكىزۋ تۋرالى:

• ۇبت الماتىدا 20 ماۋسىم مەن 5 شىلدە ارالىعىندا 8 وتكىزۋ پۋنكتىندە بارلىق قاۋىپسىزدىك شارالارىن ساقتاي وتىرىپ وتكىزىلمەك.
• ۇبت-عا ماۋسىم ايىندا 190 مەملەكەتتىك جانە 49 جەكەمەنشىك مەكتەپ قاتىسادى.
• الماتى قالاسى بويىنشا ۇبت-عا 9047 تۇلەك قاتىسادى.

كەزدەسۋ بارىسىندا مەكتەپ وقۋشىلارى ءۇشىن جازعى دەمالىس ماسەلەسى قالاي بولاتىنى تۋرالى دا قارالدى. كوروناۆيرۋس پاندەمياسى مەن ىندەتتى ءالى دە جۇقتىرۋ ءقاۋپى ساقتالىپ وتىرعانىن ەسكەرە وتىرىپ، جيىن قورىتىندىسىندا الماتى قالاسىنىڭ مەكتەپ وقۋشىلارى ءۇشىن قالا سىرتىنان دا، مەكتەپ جانىنان دا ەشقانداي لاگەرلەردى اشپاۋ جونىندە شەشىم قابىلداندى.
قازىرگى ۋاقىتتا قالا اكىمدىگى مەن قر-نىڭ ادام قۇقىقتارى بويىنشا وكىلى ارۋجان سايىنمەن بىرلەسىپ قالا بالالارىن جاپپاي سپورت، مادەنيەت جانە مەكتەپتەن تىس قوسىمشا ءبىلىم بەرۋ ءىس-شارالارىنا تارتۋ ماقساتىندا «جول كارتاسى» ازىرلەنۋدە.

1 ماۋسىمنان باستاپ الماتىدا 1-سىنىپقا باراتىن جەتكىنشەكتەردىڭ قۇجاتتارىن قابىلداۋ باستالادى. ال 15 مامىردان باستاپ دارىندى بالالارعا ارنالعان مامانداندىرىلعان گيمنازيالارعا، ليسەيلەرگە قۇجات قابىلداۋ باستالدى. قۇجاتتاردى ونلاين-قابىلداۋ بارىسىنىڭ قالاي ءوتىپ جاتقانىن، سونىمەن بىرگە، قاۋىپسىزدىك ەرەجەلەرىن ساقتاي وتىرىپ، قابىلداۋ ەمتيحاندارىن وتكىزۋگە دايىندىقتارى جونىندە №165 ليسەيدىڭ ديرەكتورى ك. وشانوۆا، «ءبىلىم-يننوۆاسيا» ينتەرناتىنىڭ ديرەكتورى گ. وسكەنباي، ش. ءۋاليحانوۆ اتىنداعى №12 گيمنازيا ديەركتورى ج. بەكجانوۆا، №39 ليسەي باسشىسى ن. مالىكوۆا، ماحامتا گاندي اتىنداعى №92 ليسەيدىڭ ديرەكتورى ە. جيەنبايەۆ، №126 ليسەي ديرەكتورى م. تولەندييەۆ باياندادى.